Օմանի դեսպանը իր հաւատարմագրերի պատճէնը յանձնեց Հայաստանի
արտգործնախարարին
14-02-2011 16:28:00 | Հայաստան | Քաղաքական
ԵՐԵՎԱՆ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 14-ին ՀՀ
արտգործնախարար Էդվարդ Նալբանդյանն ընդունեց Օմանի դեսպան Մուհամադ
բին Աուադ Ալ-Հոսանին (Mouhammad bin Awad al-Hosan, նստավայրը`
Մոսկուա)` հաւատարմագրերի պատճենի յանձնման կապակցութեամբ:
Է.Նալբանդեանը շնորհաւորեց նրան Հայաստանում դեսպան
նշանակուելու կապակցութեամբ եւ հոյս յայտնեց, որ դեսպան բին Աուադ
Ալ-Հոսանին իր նշանակալի ներդրումը կունենայ երկկողմ
յարաբերութիւնների առաւել զարգացման գործում: Նախարարը նշեց, որ
ինքը եղել է առաջին հայ բարձրաստիճան պաշտօնեան, ով այցելել է Օման
որպէս ՀՀ նախագահի յատուկ ներկայացուցիչ դեռեւս 1993-ին:
Անդրադառնալով արաբական պետութիւնների հետ Հայաստանի աւանդական
ջերմ եւ բարեկամական յարաբերութիւններին, Է.Նալբանդեանը ընդգծեց
դրանց առաւել զարգացման եւ ընդլայնման կարեւորութիւնը: Այդ
ենթատեքստում Հայաստանի արտգործնախարարը նշեց, որ միայն անցեալ
տարի արաբական երկրներում Հայաստանը երկու դիւանագիտական
ներկայացուցչութիւն է հիմնել:
Օմանի դեսպանը վստահեցրեց, որ կանի առաւելագոյնը երկու
երկրների միջեւ տարբեր բնագաւառներում համագործակցութեան
ամրապնդման համար:
Ինչպէս «ՆՏ»-ին յայտնեցին ՀՀ ԱԳՆ Մամուլի եւ տեղեկատուութեան
վարչութիւնից, հանդիպմանը զրուցակիցներն անդրադարձան միջազգային
կազմակերպություններում երկու պետութիւնների համագործակցութեան
հարցին, մտքեր փոխանակեցին մերձաւորարեւելեան խնդիրների շուրջ: