Կայացել է «ՀՄՀ-Հայաստան» ՊՈԱԿ-ի կառավարման խորհրդի հերթական
նիստը
11-02-2011 18:00:00 | Հայաստան | Տնտեսութիւն
ԵՐԵՎԱՆ, 11 ՓԵՏՐՈՒԱՐԻ, ՆՈՅԵԱՆ ՏԱՊԱՆ: «Հազարամյակի
մարտահրաւեր» հիմնադրամ-Հայաստան» պետական ոչ առեւտրային
կազմակերպութեան կառավարման խորհրդի փետրուարի 11-ի նիստում, որը
վարել է ՀՀ վարչապետ, խորհրդի նախագահ Տիգրան Սարգսեանը, օրակարգի
առաջին հարցով ՊՈԱԿ-ի գլխաւոր գործադիր տնօրէն Արա Յովսէփեանը
ներկայացրել է «ՀՄՀ-Հայաստան» ծրագրի փակման պլանի վերջնական
տարբերակը, որը վերանայուել եւ լրամշակվել էր ծրագրի ինչպէս
ամերիկեան, այնպէս էլ հայաստանեան ղեկավարների ու մասնագէտների
կողմից: Խորհուրդը հաստատել է ծրագրի փակման պլանի վերջնական
տարբերակը եւ յանձնարարել ՀՀ Արդարադատութեան նախարարութեանը
տրամադրել համապատասխան իրաւական կարծիք:
Կառավարման խորհրդի անդամները քննարկել եւ հաստատել են
«ՀՄՀ-Հայաստան» ծրագրի գնումների վերանայուած պլանը, ինչպէս նաեւ
Ոռոգման ենթակառուցուածքների բաղադրիչի շրջանակներում կնքուած երրորդ
կարգի ջրանցքների կառուցման Երկրորդ փաթեթի Լոտ 2-ի, ինչպէս նաեւ
17 պոմպակայանների վերականգնման պայմանագրերի փոփոխութիւնների
նախագծերը:
Հաւանութեան են արժանացել Ոռոգւող գիւղատնտեսութիւն
ենթածրագրի «Ջրից դէպի շուկայ» բաղադրիչի շրջանակում կնքուած ծանր
տեխնիկայի ձեռքբերման եւ «Ոռոգման կառավարման կազմակերպութիւնների
կարողութիւնների ամրապնդում» պայմանագրերի փոփոխութիւնների
նախագծերը:
Ըստ ՀՀ կառավարութեան Տեղեկատուութեան եւ հասարակայնութեան հետ
կապերի վարչութեան հաղորդագրութեան, խորհուրդը հաստատուել է
Արարատեան դաշտի դրենաժային համակարգի վերականգնման պայմանագրի
փոփոխութեան նախագիծը: Խորհուրդը հաւանութիւն է տուել հանրային
իրազեկման գործընթացի շրջանակներում իրականացուելիք
միջոցառումներին: