ԵՐԵՎԱՆ, 1 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Լեռնային Ղարաբաղի հարցով
ենթահանձնաժողովի գործունէութեան վերսկսման ԵԽԽՎ-ի նախագահ Մեւլութ
Չավուշօղլուի նախաձեռնութիւնը նպատակ ունի Լեռնային Ղարաբաղի
հիմնախնդրի լուծումը ԵԱՀԿ Մինսկի խմբից տեղափոխել այլ հարթակ:
Լրագրողների հետ փետրուարի 1-ի հանդիպմանը այս մասին յայտարարել է
ՀՀ Ազգային Ժողովի «Ժառանգութիւն» խմբակցութեան անդամ Զարուհի
Փոստանջյանը: Նա նշել է նաեւ, որ բոլոր հնարաւոր միջոցները պէտք է
ձեռնարկել, որպէսզի Լեռնային Ղարաբաղը դառնայ բանակցային լիիրաւ
կողմ:
Անցած շաբաթ ԵԽԽՎ ձմեռային լիագումար նիստում, ըստ
Զ.Փոստանջյանի, մի շարք կարեւոր որոշումներ ու փաստաթղթեր են
ընդունուել: Մասնաւորապէս, Զ.Փոստանջյանի նախաձեռնութեամբ ընդունուել
է գրաւոր յայտարարութիւն, որտեղ նշուած է, որ Լեռնային Ղարաբաղը չի
եղել 1918-1920թթ.-ի Ադրբեջանի Հանրապետութեան կազմում, իսկ
1991թ.-ի հանրաքուէի ժամանակ էլ Լեռնային Ղարաբաղի ժողովուրդը կողմ
է քուէարկել անկախութեանը: «Ղարաբաղում անցկացուած խորհրդարանական,
նախագահական ընտրութիւնները եւ 2006թ.-ի հանրաքուէն միջազգային
դիտորդների եւ կազմակերպութիւնների կողմից ճանաչուել են արդար եւ
թափանցիկ, ուստի ԼՂՀ-ն կայացած ժողովրդավարական պետութիւն է եւ
արժանի միջազգային ճանաչման»,- նշւում է յայտարարութեյան մէջ: