Դավութօղլուն հստակեցրել է Անկարայի կողմից ձեռնարկուելիք
քայլերը, եթէ Օբաման օգտագործի «ցեղասպանութիւն» եզրույթը
10-03-2010 21:00:00 | | Քաղաքական
ԱՆԿԱՐԱ, 10 ՄԱՐՏԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Թուրքիայի
արտգործնախարար Ահմեթ Դավութօղլուն հանդիպում է ունեցել ԱՄՆ-ում
Թուրքիայի դեսպան Նամըք Թանի հետ, որն ԱՄՆ Ներկայացուցիչների
պալատի յանձնաժողովի կողմից Ցեղասպանութեան բանաձեւի ընդունումից
յետոյ հետ էր կանչուել Անկարա: Համաձայն թուրքական «Սթարգազեթե»
(Stargazete) լրատուական կայքի տարածած տեղեկութիւնների,
Դավութօղլուն դեսպանի հետ քննարկումների ժամանակ հստակեցրել է
Անկարայի կատարելիք այն պատասխան քայլերը, որոնք նախատեսուած են այն
դէպքում, եթէ ԱՄՆ նախագահ Բարաք Օբաման իր ապրիլքսանչորսյան
ելոյթի ժամանակ օգտագործի «ցեղասպանութիւն» եզրույթը:
Մասնաւորապէս, նշուվել է, որ եթէ Օբաման հնչեցնի «ցեղասպանութիւն»
բառը, ապա Անկարան կսառեցնի «F-35» մարտական ինքնաթիռի, «14 CH-47
Chinook» ուղղաթիռներ մասին 1.2 մլրդ դոլար արժողութեամբ
պայմանագիրն ու «Patriot» հրթիռների վաճառքի շուրջ ընթացող
բանակցութիւնները: Ինչպէս նաեւ կսահմանափակի Իրանի եւ Աֆղանստանի
հարցում ԱՄՆ-ին ցուցաբերուող աջակցութիւնը: