ԵՐԵՒԱՆ, 15 ԴԵԿՏԵՄԲԵՐԻ, ՆՈՅԵԱՆ Տապան։ Կրթութեան ոլորտում առկայ կոռուպցիոն երեւոյթներն արտայայտւում են աւելի շատ, որովհետեւ կրթութիւնն ամենազանգուածային ոլորտն է` շուրջ 700 հազար անմիջական շահառու, սոցիալիզացիայի աստիճանը` 58 տոկոս: Այս մասին ԱՄՆ Միջազգային զարգացման գործակալութեան հայաստանեան գրասենեակի Հակակոռուպցիոն գործողութեան մոբիլիզացման ծրագրի ղեկավար Ֆրանսուայ Վեզինայի եւ նոյն գրասենեակի ժողովրդավարութեան հարցերով խորհրդատու Մարկ Լեւինսոնի հետ հանդիպմանը նշել է Հայաստանի Կրթութեան եւ գիտութեան նախարար Արմէն Աշոտեանը: «Կարեւոր է, որ մէկ տարի յետոյ հասարակութիւնն իր վրայ զգա եւ գնահատի կոռուպցիայի նուազման ուղղութեամբ կատարուած աշխատանքի արդիւնաւէտութիւնը»,- նշել է նախարարը: Ըստ ՀՀ Կը գն-ի պաշտօնական հաղորդագրութեան, ԱՄՆ Միջազգային զարգացման գործակալութեան հայաստանեան գրասենեակի ներկայացուցիչները նշել են, որ գործակալութիւնը պատրաստ է խորհրդատուական աջակցութիւն ցուցաբերել հակակոռուպցիոն ծրագրում ամրագրուած բարձրագոյն ուսումնական հաստատութիւնների հակակոռուպցիոն ռազմավարական ծրագրի, բուհերի համար հակակոռուպցիոն բովանդակութեամբ ուղեցոյցների մշակման, ինչպէս նաեւ բուհերի կարիքների գնահատման եւ հանրութեան իրազեկման ուղղութեամբ: Հանդիպման ընթացքում քննարկուել են ՀՀ կրթութեան եւ գիտութեան նախարարութեան ներկայացրած եւ Կրթական համակարգում կոռուպցիոն երեւոյթների դէմ պայքարի 2011-2012 թուականների համալիր գործողութիւնների ծրագրի իրականացման գործընթացում ԱՄՆ ՄԶԳ աջակցութեան եւ նոր ծրագրային առաջարկների հարցը:

---