Հայաստանի հետ «լուռ դիւանագտութեան» մասին Թուրքիայի նախագահ Գիւլի, վարչապետ Էրդողանի եւ արտգործնախարար Դաւութօղլուի յայտարարութիւնները ցոյց էն տալիս, որ փաստերի ակնյայտ աղաւաղումը, սուտը, անիրական տեղեկատուութեան տարածումը, դարձել է թուրքական քաղաքական մշակոյթի անբաժանելի մասը։ «Յենարան» ակումբում լրագրողների հետ նոյեմբերի 29-ի ասուլիսում այս մասին նշեց թուրքագէտ Ռուբէն Մելքոնեանը։ Ըստ նրա, «լուռ դիւանագիտութիւն»-ը իմիտացիայ է, այն շրջանառութեան մէջ է դրուել արտգործնախարար Դաւութօղլուի կողմից, ով ռազմավարութեան յայտնի տեսաբան է։ Իմիտացիոն քայլերը համոզիչ դարձնելու համար Թուրքիան ձեռնարկում է տեղեկատուական քարոզչական բնոյթի մի քանի քայլեր. օրինակ Թուրքիայի Ազգային անվտանգութեան խորհրդի կողմից Թուրքիայի համար արտաքին սպառնալիք հանդիսացող երկրների ցանկից Հայաստանի դուրս բերման մասին «տեղեկատուական արտահոսքը»։ Դրանով իսկ փորձ է արւում աշխարհին ցոյց տալ, որ Թուրքիան հաւատարիմ է իր հռչակած արտաքին քաղաքականութեան տեսլականին՝ «զրոյ խնդիրներ հարեւանների հետ», ինչպէս նաեւ թաքուն նպատակին հասնելուն՝ հարուածել Հայաստան-սփիւռք միասնութեանը։ Վերլուծաբանը չբացառեց, որ որոշ ժամանակ անց կը հնչեն յայտարարութիւններ, թէ Թուրքիայի համար վտանգ է ներկայացնում ոչ թէ Հայաստանը, այլ Սփիւռքը։ Դրա վառ ապացոյցը Թուրքիայի վարչապետ Էրդողանի՝ Ստամբուլի «Ժամանակ» հայկական օրաթերթին տուած հարցազրոյցում հնչած միտքն էր՝ «Թուրքիան ցանկանում է կարգաւորել Հայաստան-թուրքիայ յարաբերութիւնները, սակայն Սփիւռքի մտածելակերպը խոչընդոտում է դրան»։ Իսկ հայ-թուրքական յարաբերութիւնների կարգաւորումը շարունակելու վերջերս նախագահ Գիւլի արած կոչի հասցէատէրը, ըստ Ռ.Մելքոնեանի, Հայաստանի իշխանութիւնները չէն, այլ Թուրքիայի իշխող կուսակցութիւնն ու կուսակից ընկեր Ռեջեփ Թայիբ Էրդողանն է՝ վերջինիս պէտք է խնդրանք ուղղուէր հաւատարիմ մնալ ստանձնած պարտաւորութիւններին։ Ռ.Մելքոնեանը գտնում է, որ Թուրքիայի երկակի պահուածքը՝ մի կողմից արտաքին աշխարհին ներկայանալ որպէս հանդուրժող եւ պատասխանատու գործընկեր, իսկ երկրի ներսում բորբոքել հակահայկական տրամադրութիւնները, կը շարունակուի առնուազն մինչեւ 2011թ.-ը, երբ Թուրքիայում կանցկացուէն խորհրդարանական ընտրութիւններ։

---