ԵՐԵՒԱՆ, 13 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Երէկ` ուշ երեկոյեան, աւարտուել է ՀՀ վարչապետ Տիգրան Սարգսեանի գլխաւորած պատուիրակութեան մէկօրեայ աշխատանքային այցը Բրիւսէլ: Կառավարութեան ղեկավարը անձնական հանդիպում ունեցաւ Եւրոպական ժողովրդական կուսակցութեան փոխնախագահ, Եւրոպական խորհրդարանի անդամ Խայիմ Մայոր Օրեխայի հետ: Վարչապետի յաջորդ հանդիպումը Եւրոպական Միութեան Յանձնաժողովում էր, որտեղ Տիգրան Սարգսեանը հանդիպեց Եւրամիութեան առեւտրի հարցերով յանձնակատար Կարել դը Գուխտի հետ: Հանդիպման օրակարգում Հայաստան- ԵՄ առեւտրատնտեսական յարաբերութիւնների ընթացքն ու հեռանկարներն էին: Կառավարութեան ղեկավարը ներկայացրեց Հայաստանի Հանրապետութեան տնտեսութեան ներկայ վիճակն ու համակողմանիօրէն անդրադարձաւ մեր երկրում ընթացող բարեփոխումներին: Նշուեց, որ առկայ համագործակցութիւնը դրուած է ինստիտուցիոնալ ամուր հիմքերի վրայ եւ ներառում է բոլոր առաջնահերթ ոլորտները, որտեղ կառավարութիւնն իրականացնում է բարեփոխումներ: Այդ համատեքստում կարեւորուեց ԵՄ օժանդակութիւնը, որ հնարաւորութիւններ է ստեղծում բարեփոխումների իրականացման ու մասնաւորապէս կարողութիւնների ամրապնդման համար: Զրուցակիցներն անդրադարձան Եմ-ի հետ խորը եւ համապարփակ ազատ առեւտրի մասին համաձայնագրի կարեւորութեանը եւ ներկայացրեցին բանակցութիւններ սկսելու վերաբերեալ կողմերի պատկերացումները: Երկուստէք շեշտուեց Հայաստանում ընթացող բարեփոխումներին նոր թափ հաղորդելու անհրաժեշտութիւնը: Հանդիպման աւարտին վարչապետը Կարել դէ Գուխտին փոխանցեց Հայաստան այցելելու ՀՀ Նախագահ Սերժ Սարգսեանի հրաւէրը: Ըստ Ըստ ՀՀ կառավարութեան Տեղեկատուութեան եւ հասարակայնութեան հետ կապերի վարչութեան հաղորդագրութեան, այնուհետեւ Տիգրան Սարգսեանն իր կեցավայրում ընդունեց Բելգիայի առաջատար ադամանդագործական ընկերութիւնների ներկայացուցիչներին: Հանդիպման օրակարգում մեր երկրում առկայ ներդրումային հնարաւորութիւններն էին ու ՀՀ կառավարութեան ոլորտին ուղղուած աջակցութեան հարցը, որը վերաբերում է հումքային խնդիրների երկարաժամկէտ ու կայուն կանոններով լուծմանը: Պայմանաւորուածութիւն ձեռք բերուեց յարաբերութիւններն ինստիտուցիոնալ մակարդակի բարձրացնելու վերաբերեալ: Վարչապետ Սարգսեանն աշխատանքային այցի աւարտին եղաւ «Հայաստանի եւրոպական բարեկամներ» կազմակերպութեան գրասենեակում, ծանօթացաւ կառոյցի գործունէութեանը, ինչպէս նաեւ մասնակցեց Հայաստանի ներքին ու արտաքին քաղաքականութեան հարցերին նուիրուած քննարկմանը, որին ներկայ էին Հարաւային Կովկասի երկրների հարցով ԵՄ յատուկ ներկայացուցիչ Պիտեր Սեմնեբին, Բելգիայի Թագաւորութիւնում հաւատարմագրուած մի շարք պետութիւնների եւ հայկական կազմակերպութիւնների ներկայացուցիչներ, գիտնականներ ու վերլուծաբաններ:

---