Մոսկուայի հայերը անցկացրին Մայրենի լեզի հրաշալի տոն
04-03-2010 11:30:00 | Ռուսաստան | Հասարակութիւն
ՄՈՍԿՈՒԱ, 4 ՄԱՐՏԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Փետրուարի 21-ի
անսովոր ձնառատ եւ ցուրտ կիրակի օրը Մոսկուայի հայերի համար առաջին
անգամ անցկացուեց իսկապէս հոգին ջերմացնող տոն` Մայրենի լեզուի
միջազգային օրը: Տոնը կայացաւ Հայաստանեայց առաքելական եկեղեցու
Նոր Նախիջեւանի եւ Ռուսաստանի թեմին կից «Հայորդաց տուն»
հոգեւոր-լուսավորական կենտրոնի (ղեկավարներ` Տեր Առաքել, Հմաեակ
Գեւորգեան եւ Անահիտ Թորոսյան) եւ «Արարատ» հայ
մշակոյթային-լուսավորական ընկերութիւն» տարածաշրջանային
հասարակական կազմակերպութեան (ղեկավարներ` Էմանուիլ Դոլբակյան եւ
Ալբինա Սուքիասեան) համատեղ ջանքերով:
Ինչպէս յայտնում են «Արարատ» ընկերությունից, «Թատրոնը
լեփ-լեցուն էր»: Ներկայ էին ուսուցչական կոլեկտիւը, Հոգեւոր
կենտրոնի հարիւրաւոր աշակերտներ, ծնողներ, «Արարատ» ընկերութեան
անդամներ, այլ հիւրեր: Տարբեր տարիքի եւ դասարանների աշակերտները
ցուցադրեցին իրենց շնորհները` ոտանաւորներ կարդացին, երգեցին երգեր
նուիրուած մայրենի լեզուին, մայր հայրենիքին: «Դա յուզիչ էր, դա
հրաշալի էր»:
Էմանուիլ Դոլբակեանը իր ելոյթում համառոտակի ներկայացրեց
հայոց լեզուի ծագման եւ կայացման վաղնջական շրջանը, նրա տեղը
լեզուների հնդեւրոպական մեծ ընտանիքում եւ քննադատական գնահատական
տվեց հայագիտութեան ներկայ կացութեանը: