ԱԺ-ի պատգամաւորութեան թեկնածուների վստահուած անձանց միջեւ
ծեծկռտուքի կապակցութեամբ կատարւում է հետաքննութիւն
11-01-2010 11:50:00 | Հայաստան | Քաղաքական
ԵՐԵՎԱՆ, 11 ՅՈՒՆՎԱՐԻ, ՆՈՅԵԱՆ ՏԱՊԱՆ: Յունվարի 10-ի ժամը
14:45-ին ոստիկանութեան Կենտրոնականի բաժնում ահազանգ է ստացուել,
որ Ջոն Կիրակոսեանի անուան միջնակարգ դպրոցում տեղակայուած թիւ 10/09
ընտրատեղամասի դիմաց վիճաբանութիւն է տեղի ունենում:
Ըստ Հայաստանի Ոստիկանութեան հաղորդագրութեան, պարզուել է, որ
ԱԺ պատգամաւորութեան թեկնածու Արա Սիմոնեանի վստահուած անձ,
1964թ.-ին ծնուած Տիգրան Մուրադեանի հետ վիճաբանել են ԱԺ
պատգամաւորութեան թեկնածու Նիկոլ Փաշինյանի վստահուած անձինք`
1950թ.-ին ծնուած Պետրոս Մակեյանը, 1979թ.-ին ծնուած Կարեն Մակեյանը
եւ 1983թ.-ին ծնուած Սուրէն Մարտիրոսեանը: Ըստ նոյն աղբիւրի,
վերջինները ծեծի են ենթարկել Տ.Մուրադեանին եւ մարմնի տարբեր
մասերում պատճառել սալջարդեր: Տ.Մուրադեանից ընդունուել է հաղորդում
եւ տրուել դատաբժշկի ուղեգիր:
Նոյն օրուայ ժամը 15:35-ին Երեւանի թիւ 1 համալսարանական
հիւանդանոցից ահազանգ է ստացուել, որ իրենց մօտ բուժօգնութեան են
դիմել Սուրէն Մարտիրոսեանը` դէմքի մասում ստացած սալջարդով, Պետրոս
Մակեյանը` քթի մասում ստացած սալջարդով ու գանգուղեղային
վնասուածքներով, եւ Կարեն Մակեյանը` թիկունքի մասում ստացած
քերծվածքներով:
Կատարւում է հետաքննութիւն: