Հայկական կազմակերպութիւնը Ախալցխայում ամենաբարձրն է
գնահատուել USAID-ի «Ժողովրդավարութիւն եւ կառավարում» ծրագրի
կողմից
19-11-2009 15:05:00 | Հայաստան | Հասարակութիւն
ԱԽԱԼՑԽԱ, 19 ՆՈՅԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Ախալցխայում գործող տարբեր կազմակերպութիւնների ներկայացուցիչներ
օրերս հանդիպել են USAID-ի «Ժողովրդավարութիւն եւ կառավարում»
ծրագրի տեղական գրասենեակի ծրագրերի գծով մասնագէտ Քեթի Բաքրաձեի
հետ:
«Ժողովրդավարութիւն եւ կառավարում» ծրագրի շրջանակում
Վրաստանի ամբողջ տարածքում նման հանդիպումներ են անցկացւում`
կազմակերպութիւնների վերաբերեալ տարեկան զեկոյց պատրաստելու
նպատակով, որտեղ գնահատւում է վերջիններիս գործունէութիւնը:
Հարցումները հիմնականում վերաբերում են ֆինանսական, սոցիալական,
տնտեսական եւ իրաւաբանական ոլորտներին:
Ինչպէս տեղեկացնում է Akhaltskha.net կայքը, հանդիպմանը
մասնակցել են «Դեմոկրատ Մեսխերի», «Տոլեռանտ», «Հարաւային դարպաս»,
«Ախալցխայի հայկական երիտասարդական կրթամշակութային կենտրոն» եւ մի
շարք այլ կազմակերպութիւնների ներկայացուցիչներ:
Հարցումների արդիւնքում պարզ է դարձել, որ Ախալցխայում
գործող կազմակերպութիւնների շարքում ամենաբարենպաստ վիճակում
գտնւում է Ախալցխայի հայկական երիտասարդական կրթամշակութային
կենտրոնը, որը չի ֆինանսաւորւում դոնոր կազմակերպութեան կողմից եւ
գրանտային ծրագրեր չի կազմում, այլ ֆինանսաւորւում է բարերարների
կողմից: