Փարիզում տեղի է ունեցել «Հայաստանի լոյսը» լուսանկարչական ալբոմի շնորհանդէսը
29-09-2010 19:54:00 | Հայաստան | Մշակոյթ
ՓԱՐԻԶ, 29 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի անկախութեան 19-րդ տարեդարձի նշման շրջանակներում Ֆրանսիայում Հայաստանի դեսպանի բարձր հովանու ներքոյ սեպտեմբերի 27-ին Փարիզի «Սանթրալիենների տանը» տեղի է ունեցել «Հայաստանի լոյսը» լուսանկարչական ալբոմի շնորհանդէսը: Միջոցառման կազմակերպիչն էր ֆրանսահայ գործարար Սիրիլ Վասկոլ Կազանջյանը (Cyril Waskoll Kazandjian) եւ նրա հիմնադրած «Հայաստանի լոյսը» միութիւնը:
Ֆրանսիացի յայտնի արուեստագէտ-լուսանկարիչ Ժան-Միշել Բերցի (Jean-Michem Berts) սեւ-սպիտակ լուսանկարներում ներկայացուած է Հայաստանի ու Արցախի վաղնջական խորհուրդն ու նախաստեղծ գեղեցկութիւնը, հայոց բնաշխարհի միստիկական լոյսն ու խորախորհուրդ զօրութիւնը:
Ըստ ՀՀ ԱԳՆ Մամուլի եւ տեղեկատուութեան վարչութեան հաղորդագրութեան, շնորհանդէսին ներկաներին ողջոյնի խօսքով դիմել է Ֆրանսիայում Հայաստանի դեսպան Վիգէն Չիտեչեանը:
Միջոցառմանը հրաւիրուած էին Ֆրանսիայի կառավարական շրջանների, Փարիզում հաւատարմագրուած դիւանագիտական անձնակազմի, քաղաքական, հասարակական, լրատուական, մշակոյթային, գիտակրթական ոլորտների ներկայացուցիչներ, ֆրանսահայ համայնքային կառոյցների անդամներ: