ԵՐԵՎԱՆ, 24 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ՀՀ սփիւռքի
նախարարութեան նախաձեռնութեամբ բացուեց իրաքահայ գեղանկարիչ
Անդրանիկ Օհաննեսյանի նկարների ցուցահանդէսը
Սեպտեմբերի 23-ին ՀՀ սփիւռքի նախարար Հրանուշ Յակոբեանը
մասնակցեց Երեւանի պատմութեան թանգարանում իրաքահայ գեղանկարիչ
Անդրանիկ Օհաննեսյանի անհատական ցուցահանդէսի բացման
արարողութեանը:
Ողջունելով գեղանկարչին` նախարար Յակոբեանը նշեց, որ Իրաքի
ծանր տնտեսական պայմաններում հայերը ոչ միայն ապրում են, այլ նաեւ
ստեղծագործում: «Վկան` Անդրանիկ Օհաննեսյանի վառ մտքերով եւ
գոյներով ստեղծած եւ ցուցադրուած 35 կտաւներն են: Մի կողմից
հեղինակն անդրադառնում է Հայոց Ցեղասպանութեան թեմային, միւս
կողմից` գեղանկարներում առկայ է հայի ազատատենչ ձգտումն ու ոգին», -
ընդգծեց տիկին Յակոբեանը:
Նախարարը իրաքահայ համայնքին մաղթեց ուժ` դժուարութիւններին
դիմակայելու համար եւ նշեց, որ ՀՀ սփիւռքի նախարարութիւնը
պատրաստ է աջակցել վերջիններիս ծառացած խնդիրների լուծման հարցում:
Շնորհակալութիւն յայտնելով Երեւանի քաղաքապետ Գագիկ
Բեգլարեանին` ցուցահանդէսի բացմանը թանգարանի սրահը տրամադրելու
համար` գերատեսչութեան ղեկավարը կարեւորեց նման միջոցառումների
կազմակերպման համար քաղաքապետարանի մշտական պատրաստակամութիւնը:
ՀՀ սփիւռքի նախարարութեանն ուղղուած շնորհակալական խօսքով
հանդէս եկաւ Իրաքի հայոց ազգային կենտրոնական վարչութեան նախագահ
Պարոյր Յակոբեանը:
Վարչութեան նախագահը նշեց, որ նման միջոցառումների անցկացումը
մեծապէս նպաստում է համայնքում ազգային ոգու զարթոնքին եւ
Հայրենիք-Սփիռք կապերի մերձեցմանը:
Ցուցահանդեսին ներկայ էին եւ գեղանկարչին ուղղուած գնահատանքի
խօսքերով հանդէս եկան ՀՀ սփիւռքի նախարարութեան կազմակերպած
Կերպարուեստի գործիչների համահայկական համաժողովի արուեստագէտներ եւ
ՀՀ բարձրագոյն ուսումնական հաստատութիւնների սփիւռքահայ
շրջանաւարտների հաւաքի մասնակիցներ: