Լիբանանի նախագահը Իսրայելին մեղադրել է երկրում
կրոնական թշնամանք բորբօքելու ցանկութեան մէջ
04-06-2009 16:10:00 | | Միջազգային
ԲԵՅՐՈՒԹ, 4 ՅՈՒՆԻՍԻ, ՆՈՅԵԱՆ ՏԱՊԱՆ: Լիբանանի նախագահ Միշել
Սուլեյմանը հարեւան Իսրայելին մեղադրել է «լրտեսական ագենտուրայի
միջոցով երկրում կրոնական թշնամանք բորբօքելու» ձգտման մէջ:
Լիբանանի ղեկավարը հինգշաբթի այցելել է Ազգային անվտանգութեան
վարչութեան կենտրոնակայան եւ յատուկ ծառայութիւնների
աշխատակիցներին անձամբ շնորհաւորել իսրայելական գործակալների
ընդհատակյա ցանցի յայտնաբերման հաջողութեամբ իրականացուած
գործողութեան առթիւ:
Լիբանանի ԶԼՄ-ների տեղեկութիւններով, վերջին երկու ամիսներին
ձերբակալուել է աւելի քան 35 մարդ, որոնք խօստովանել են, որ գործել
են իսրայելական հետախուզութեան համար: Դրանց թւում կան մի քանի
զինծառայողներ, այդ թւում բարձր պաշտօններ զբաղեցնող երկու գնդապետ
եւ երկու պաշտօնաթող գեներալ:
Քննութեան նիւթերին ծանօթանալով, ինչպէս հաղորդում է
«Ալ-Վաթանիա» լրատուական գործակալութիւնը, Սուլեյմանը Լիբանանի դէմ
լրտեսությունը համարել է «տեռորի եւ ագրեսիաների իսրայելական
քաղաքականութեան շարունակութիւն»: Ըստ նրա, Իսրայելը «չի
դադարեցնում լիբանանեան պետութիւնը պառակտելու փորձերը»: