Մոլդաւիայի խորհրդարանը մտադիր է մէկ անգամ եւս անցկացնել
նախագահի ընտրութիւններ
03-06-2009 15:45:00 | | Միջազգային
ՔԻՇՆԵՎ, 3 ՅՈՒՆԻՍԻ, ՆՈՅԵԱՆ ՏԱՊԱՆ: Մոլդաւիայի խորհրդարանը
չորեքշաբթի երկրորդ անգամ երկրի նախագահ ընտրելու փորձ կձեռնարկի,
հաղորդում է «Ինտերֆաքսը»:
Առաջին ընտրութիւնների ընթացքում, որ կայացան մայիսի 20-ին,
կառավարող Կոմունիստների կուսակցութեան առաջադրած երկու
թեկնածուներից ոչ մէկը չստացաւ անհրաժեշտ 61 ձայն: Հիմնական
թեկնածուն` գործող վարչապետ Զինաիդա Գրեչաննայան, ստացաւ
Կոմունիստների կուսակցութիւնից ընտրուած 60 պատգամաւորների քվեն,
իսկ ընդդիմությունը հրաժարուեց մասնակցել ընտրութիւններին:
Ինչպէս հաղորդուել է, կրկնական ընտրութիւններում նախագահի
պաշտօնի համար առաջադրուել են գործող վարչապետ Գրեչաննայան եւ
Ռուսաստանում Մոլդաւիայի դեսպան Անդրեյ Նեգուցան: Ընտրութիւնները
նշանակուած էին մայիսի 28-ին, սակայն նիստը հետաձգուեց Կոմունիստների
կուսակցութեան նախաձեռնութեամբ: Կոմունիստներն իրենց որոշումը
պատճառաբանում էին նրանով, որ այդ օրը Մոլդավիայում նշւում է Տիրոջ
համբարձման օրը:
Ընտրութիւնները մէկ շաբաթով հետաձգվեցին, միաժամանակ
կոմունիստները առաջարկեցին երկխօսութիւն սկսել ընդդիմութեան հետ
նախագահի ընտրութեան համար անհրաժեշտ աջակցութիւն (ընդամէնը մէկ
ձայն) ստանալու եւ վաղաժամկէտ խորհրդարանական ընտրութիւնները
կանխելու նպատակով: Սակայն, ընդդիմադիր երեք կուսակցութիւններից
ոչ մէկը ոչ միայն չհամաձայնեց ձայն տալ նախագահի ընտրութեան համար,
այլեւ երկխօսութիւն չսկսեց անգամ այդ թեմայով իշխանութեան հետ:
Չորեքշաբթի ընդդիմությունը մտադրուել է լքել նիստերի դահլիճը
եւ չմասնակցել նախագահի ընտրութեան գաղտնի քուէարկութեանը: