Օբաման կայցելի արաբական Արեւելքի եւ Եւրոպայի երկրներ
02-06-2009 19:32:00 | ԱՄՆ | Միջազգային
ՎԱՇԻՆԳՏՈՆ, 2 ՅՈՒՆԻՍԻ, ՆՈՅԵԱՆ ՏԱՊԱՆ: ԱՄՆ-ի նախագահ Բարաք
Օբաման երեքշաբթի ուղեւորութեան կմեկնի արաբական Արեւելքի եւ
Եւրոպայի երկրներ:
Չորեքշաբթի Օբաման կլինի Սաուդյան Արաբիայում, որտեղ այդ
երկրի թագավոր Աբդալլա բեն Աբդել Ազիզի հետ կքննարկի Իրանի
միջուկային ծրագրի հետ կապուած իրավիճակը, ահաբեկչութեան դէմ
պայքարի հարցեր եւ մերձաւորարեւելեան կարգաւորման խնդիրները:
Ինչպէս հաղորդել է Սպիտակ տունը, բանակցութիւնների
կենտրոնական թեմաներից կլինեն նաւթի գները: Ըստ ԱՄՆ-ի նախագահի
ռազմավարական հաղորդակցութիւնների հարցերի գծով խորհրդականի
տեղակալ Դենիս Մաքդոնոֆի, Օբամայի այցը Սաուդյան Արաբիա
«մուսուլմանական աշխարհի հետ շփումներ հաստատելու ամերիկեան
վարչակազմի ձգտումների արտայայտութիւնն է»: Այդ ռազմավարութեան
շրջանակում էլ կանցնի ԱՄՆ-ի նախագահի ուղեւորութեան երկրորդ օրը
եւս, որը նա կանցկացնի Եգիպտոսում: Ամերիկեան առաջնորդը յունիսի
4-ին երկկողմ բանակցութիւններ կվարի Եգիպտոսի նախագահ Հոսնի
Մուբարաքի հետ: Այս հանդիպումը կեզրափակի մերձաւորարեւելեան
կարգաւորմանն ուղղուած Օբամայի հանդիպումների ցուցակը:
Յունիսի 5-ին ԱՄՆ-ի նախագահը կմեկնի Գերմանիա: Ուղեւորութեան
վերջին հանգրուանը կլինի Ֆրանսիան. յունիսի 6-ին նորմանդական
Կաննում նա երկկողմ բանակցութիւններ կվարի իր ֆրանսիացի
պաշտօնակից Նիկոլա Սարկոզիի հետ: