Երեւանում ԱՄՆ դսպանատան առջեւ անցկացուեց ցոյց
զարթուցիչներով եւ «Եկել է փոփոխութիւնների ժամանակը» պաստառներով
24-04-2009 19:35:00 | Հայաստան | Քաղաքական
ԵՐԵՎԱՆ, 24 ԱՊՐԻԼԻ, ՆՈՅԵԱՆ ՏԱՊԱՆ: Ապրիլի 23-ին հայկական
առաջին սոցիալական կայքի` hayland.am-ի նախաձեռնութեամբ Երեւանում
ԱՄՆ դեսպանատան առջեւ կազմակերպուել էր ցոյց ի յիշատակ 1915թ.
Հայոց Ցեղասպանութեան զոհերի եւ ի հիշեցում Միացեալ Նահանգներին,
յանձինս նրա նորընտիր նախագահ Բարաք Օ'բամայի, հաւատարիմ մնալ իր
խոստումին` ճանաչել ցեղասպանութեան փաստը: Hayland.am-ի
նախաձեռնութեանը միացել էին մի շարք հասարակական եւ երիտասարդական
կազմակերպութիւններ:
«Եկել է փոփոխութիւնների ժամանակը», «Որտե՞ղ են
փոփոխութիւնները», «Միացե'ք ճշմարտութեանը, ճանաչե'ք
ցեղասպանութիւնը», «Հիշի'ր խոստումդ, ճանաչի'ր ցեղասպանութիւնը».
այս պաստառներով ցուցարարները լուռ կանգնել էին դեսպանատան առջեւ,
այնուհետեւ 100 զարթուցիչի զանգերով ազդարարեցին «փոփոխութիւնների
ժամանակը»: Ակցիայի աւարտին ցուցարարները արձակեցին օդապարիկներ
«Երբ է գալու փոփոխութիւնների ժամանակը» գրուածքով: