Հայաստանում խնդիրների առկայութեան պատճառներից մէկը
տգիտությունն է,- գտնում է Տիգրան Թորոսեանը
26-03-2009 17:25:00 | Հայաստան | Քաղաքական
ԵՐԵՎԱՆ, 26 ՄԱՐՏԻ, ՆՈՅԵԱՆ ՏԱՊԱՆ: «Ես որոշել եմ չարձագանքել
հերյուրանքներին»,- մարտի 26-ի ասուլիսում յայտարարեց Ազգային
Ժողովի նախկին նախագահ, ներկայումս անկախ պատգամաւոր Տիգրան
Թորոսեանը` պատասխանելով այն հարցին, թէ արդեօ՞ք իրականութեանը
համապատասխանում են մամուլում հրապարակուած այն լուրերը, թէ ինքը
բնակարան է գնել էլիտար շէնքում եւ երթեւեկում է ԱԺ-ի նախագահի
մեքենայով: Տ.Թորոսեանը նշեց, որ թէեւ ինքը մի որոշ ժամանակ, ԱԺ-ի
ղեկավարութեանը յղած համապատասխան դիմումից յետոյ, օգտուել է ԱԺ-ի
նախագահին յատկացուած մեքենայից, սակայն որոշ թերթեր, օգտվելով
առիթից, ստեր են յորինել: «Այդ «գործընթացը» սկսուել է ամռանը, երբ
փնջերով յօդուածներ էին տպվում իմ մասին»,- նկատեց նա:
Անդրադառնալով հայ-թուրքական սահմանի բացման մասին լուրերին,
Տ.Թորոսեանը նշեց, որ թուրքերը լուրջ մտավախութիւն ունեն, որ
ԱՄՆ-ի նախագահ Բարակ Օմաբայի ապրիլի 24-ի ուղերձն իրենց համար
տհաճություն կպարունակի: Այդ պատճառով, ըստ պատգամաւորի, թուրքերը
խօսակցութիւններ են ծաւալում սահմանի հնարաւոր բացման մասին,
«որպէսզի ապրիլի 24-ն իրենց համար սահուն անցնի»:
«Ի՞նչն է պատճառը, որ Հայաստանը նորմալ երկիր չի դառնում»
հարցին ի պատասխան Տ.Թորոսեանը նշեց, որ երկիրն իսկապէս խնդիրներ
ունի, որոնց հիմնական պատճառը բազմակուսակցական համակարգի
չկայացվածությունն է: «Միւս պատճառը տգիտությունն է` իր արտասովոր
դրսեւորումներով»,- ասաց նա:
Անդրադառնալով դրամի արժեզրկմանը, Տ.Թորոսեանը կարծիք
յայտնեց, որ դա ամէնեւին օգտակար չէր հասարակութեան համար:
Տնտեսական ճգնաժամի հետեւանքների հաղթահարմանն ուղղուած
կառավարութեան գործողութիւնները եւս, ըստ նրա, լաւատեսութիւն չեն
ներշնչում:
Ինչ վերաբերում է «Յոթի գործով» դատավարութեանը, ապա այն,
Տ.Թորոսեանի խօսքերով, վարկաբեկիչ է թէ' երկրի, թէ' ընդդիմութեան,
թէ' քաղաքական միւս ուժերի համար: