ԵՐԵՎԱՆ, 17 ՄԱՐՏԻ, ՆՈՅԵԱՆ ՏԱՊԱՆ: Հայ ազգային կոնգրեսի եւ «Ժառանգութիւն» կուսակցութեան միջեւ Երեւանի աւագանու մայիսի 31-ի ընտրութիւններում միասնական ընտրական ցուցակով հանդէս գալու վերաբերեալ պաշտօնական բանակցութիւններում համաձայնութիւն ձեռք չի բերուել: Ինչպէս մարտի 17-ին Հայաստանի Ազգային ժողովում լրագրողներին յայտնեց «Ժառանգութեան» վարչութեան նախագահ, պատգամաւոր Անահիտ Բախշեանը, նախօրէին մինչեւ կէսգիշեր տեւած նիստում վարչութիւնը քննարկել է ընտրական ցուցակի ՀԱԿ-ի առաջարկած տարբերակը: Ըստ այդմ, առաջին հորիզոնականում Լեւոն Տեր-Պետրոսեանի, երկրորդում` Հայաստանի Ժողովրդական կուսակցութեան նախագահ Ստեփան Դեմիրճեանի թեկնածութիւններն են: «Ժառանգութեանը» առաջարկուել է ցուցակում ընդհանուր առմամբ 8 տեղ, այդ թւում երրորդ հորիզոնականը: Ըստ Ա.Բախշեանի, կուսակցութեան վարչութիւնը եկել է համոզման, որ այն «չի արտացոլում կուսակցութեան ներուժը, եւ առաջարկել է ցուցակի իր` «աւելի մրցունակ» տարբերակը. առաջին հորիզոնականում` «Ժառանգութեան» խորհրդարանական խմբակցութեան ղեկավար Արմէն Մարտիրոսեան, երկրորդում` Լ.Տեր-Պետրոսեան, երրորդում` «Ժառանգութեան» հիմնադիր, ԱԺ-ի պատգամաւոր Րաֆֆի Յովհաննիսեան: ՀԱԿ-ը այն մերժել է: Ի պատասխան լրագրողների հարցերին Ա.Բախշեանը նշեց, որ իրենք համաձայնութեան չգալը պառակտում չեն համարում, քանզի քաղաքականութեան մէջ կարեւորում են սկզբունքներն ու գաղափարախօսութիւնը: Նա նաեւ հոյս յայտնեց, որ «հասարակական հնչեղությունը կհանգեցնի նրան, որ ՀԱԿ-ն ու կուսակցութիւնը կրկին նստեն բանակցութեան»: Միաժամանակ նա չբացառեց նաեւ «առանձին շարասյուներով» ընտրութիւններին ընդդիմութեան մասնակցութեան հնարաւորութիւնը` նշելով, որ կուսակցութիւնը մարտի 20-ին վերջնականապէս կհստակեցնի մասնակցութեան ձեւաչափն ու ընտրական ցուցակը:

---