Հայաստանի Կենտրոնական բանկը առաջարկում է խստացնել
արժոյթային օրէնսդրութեան պահանջները խախտող անձանց նկատմամբ
պատասխանատւութիւնը
17-03-2009 18:00:00 | Հայաստան | Տնտեսութիւն
ԵՐԵՎԱՆ, 17 ՄԱՐՏԻ, ՆՈՅԵԱՆ ՏԱՊԱՆ: Մարտի 17-ին Հայաստանի
Ազգային ժողովը ընդունեց նախօրէին քննարկված օրինագծերն ու
օրենսդրական փաթեթները, որոնցով փոփոխութիւններ եւ լրացումներ են
նախատեսւում մի շարք գործող օրէնքներում եւ օրէնսգրքերում:
Այդ թւում առաջին ընթերցմամբ ընդունուեց Վարչական
իրաւախախտումների վերաբերեալ եւ Քրէական օրէնսգրքերում,
«Արժոյթային կարգաւորման եւ արժոյթային վերահսկողութեան մասին»
օրէնքում կառավարութեան կողմից առաջարկուած փոփոխութիւնների
փաթեթը: Վերջինի նպատակը, ըստ Կենտրոնական բանկի նախագահ Արթուր
Ջաւադեանի, դոլարիզացիայի եւ ստուերային տնտեսութեան դէմ պայքարն ու
կանխումն է: Ըստ այդմ, առաջարկւում է խստացնել արժոյթային
օրէնսդրութեան պահանջները խախտող անձանց նկատմամբ
պատասխանատւութիւնը:
«Գոյքի նկատմամբ իրաւունքների պետական գրանցման մասին»
օրէնքում առաջին ընթերցմամբ ընդունուած փոփոխութիւնները, ըստ
հիմնական զեկուցող, արդարադատութեան նախարարի առաջին տեղակալ
Գեւորգ Մալխասեանի, պայմանաւորուած են պետական ծառայութեան
համակարգում միասնական մօտեցում ապահովելու անհրաժեշտութեամբ:
Մասնաւորապէս, առաջարկւում է ուժը կորցրած ճանաչել անշարժ գոյքի
պետական կադաստրի եւ վերջինի տարածքային ստորաբաժանումների
ղեկավարների պաշտօններում նշանակման եւ ազատման հիմքերն ամրագրող
դրոյթները` «Քաղաքացիական ծառայութեան մասին» ՀՀ օրէնքի հետ
հնարաւոր հակասութիւնները վերացնելու նպատակով: Ներկայումս գործող
օրէնքով տուեալ պաշտօններում կարող են նշանակուել բարձրագոյն
կրթութիւն ունեցող մինչեւ 60 տարեկան քաղաքացիները, մինչդեռ
քաղծառայության մասին օրէնքով քաղծառայության պաշտօնների համար
տարիքային սահմանափակումը 65-ն է:
Օրինագծին դէմ քուէարկեց միակ ընդդիմադիր «Ժառանգութիւն»
խմբակցութիւնը: Վերջինի ղեկավար Արմէն Մարտիրոսեանը «ՆՈՅԵԱՆ
ՏԱՊԱՆ»-ի թղթակցին յայտնեց, որ անձամբ ինքը կողմ է տարիքայիան
սահմանափակման վերացմանը բոլոր այն կառոյցներում, որտեղ յատուկ
պատրաստուածութեան հետ խնդիրներ չեն առաջանում, բայց դէմ է, «երբ
օրէնքները կարում են ինչ-որ մէկ անձի հագով»: Նրա պարզաբանմամբ,
խօսքը վերաբերում է մամուլում տեղ գտած եւ շրջանառուող այն
լուրերին, որ երկրի Նախագահը ցանկանում է կադաստրի պետական կոմիտէի
նախագահի պաշտօնում նշանակել Երեւանի նախկին քաղաքապետ Երուանդ
Զախարյանին, սակայն գործող տարիքային սահմանափակումը խոչընդոտում է
դրա իրականացմանը: