ԵՐԵՎԱՆ, 6 ՄԱՐՏԻ, ՆՈՅԵԱՆ ՏԱՊԱՆ: Այսօր Հայաստանի ամենամեծ խնդիրը տնտեսական աճի անկման կասեցումն է, որը լուծելու համար, առաջին հերթին, պէտք է թեթեւացնել հարկային բեռը, դրսից բերուած գումարները իսկապէս նպատակային օգտագործել` առաւելագոյն աճի, աշխատատեղերի ստեղծման համար,- այս մասին Հանրային հեռուստաընկերութեան «25 րոպե» ծրագրին տուած հարցազրոյցում նշեց «Սիվիլիթաս» հիմնադրամի խորհրդի նախագահ, նախկին ՀՀ արտգործնախարար Վարդան Օսկանեանը: Ըստ նրա, Հայաստանը պէտք է կարողանայ նաեւ վերացնել տնտեսութեան ամենամեծ խցանիչ տարրը` մենաշնորհը, եւ ստեղծել մրցակցութեան հաւասար դաշտ: Այս երեք քայլերն անելու դէպքում, ըստ Վ.Օսկանեանի, երկիրը կկարողանայ յաղթահարել ճգնաժամը: Վ.Օսկանեանը գտնում է, որ կառավարութիւնը իր վրայ աւելի մեծ պատասխանատւութիւն պէտք է վերցնի, աւելի թափանցիկ, աւելի անկեղծ լինի հասարակութեան հետ: Վ.Օսկանեանը գտնում է, որ դրամի արժեզրկումը անխուսափելի էր, իսկ դրա կասեցումը` անհնարին, եւ կառավարութեան մեղքն այս հարցում այն էր, որ մինչեւ վերջին պահը կառավարութիւնը հերքում էր դրա անհրաժեշտութիւնը. «Իհարկէ, դա անում էր քաղաքական նպատակներով, իր խնդիրները ուներ լուծելու, բայց դա կառավարութեան հեղինակութեանը մեծ հարուած էր: Կառավարութիւնը հասարակութեան վստահութիւնը կորցրեց եւ դա այսօր, ճգնաժամային պայմաններում, կարծում եմ, շատ վնասակար է: Առանց կառավարութեան եւ նրա կողմից արուելիք քայլերի նկատմամբ հասարակութեան վստահութեան, մենք շատ աւելի մեծ դժուարութիւնների առաջ կկանգնենք»: Ըստ Վ.Օսկանեանի, անհնարին է նաեւ 2009թ.-ի բիւջէով նախատեսուած 9% տնտեսական աճը ապահովելը: «Հարց է առաջանում` արդեօք կառավարութիւնը նույնպես կարհամարհի՞ այդ հարցը, կանտեսի՞, դրա մասին չի՞ խօսի, կասի՞, որ նման խնդիր չունենք, թէ` կառավարութիւնը այս հարցին կանդրադառնա աւելի բաց, աւելի թափանցիկ, ժողովրդին իսկապէս կը բացատրի, թէ այդ հարցում ինչ է արել»,- շեշտեց նախկին արտգործնախարարը` յաւելելով, որ կառավարութիւնը առիթ ունի վերաշահել իր նկատմամբ ժողովրդի վստահութիւնը, պէտք է հայտարարի` «մենք սխալուել ենք բիւջէի մէջ 9% տնտեսական աճ նախատեսելով, դա սխալ հաշուարկ էր, միգուցէ` գերագնահատե՞լ էինք»: Ըստ նախկին արտգործնախարարի, նոյնիսկ բիւջէի ծախսերը կրճատելու, բիւջէի դեֆիցիտը մեծացնելու կամ «դրսից բերած փողերը դէպի բիւջէ ուղղելու» դէպքում 9-9,5% տնտեսական աճ հնարաւոր չէ ապահովել: «Հասարակութիւնն այսօր մտահոգուած է, որ կառավարութիւնը գնալու է 9% աճ ապահովելու` ի հաշիւ հարկերի, դա մնալու է փոքր ու միջին բիզնեսի վրայ, որովհետեւ դրա նախանշանները կան, որն է հաշւիչ-դրամարկղային մեքենաների կիրառումը` այս նոր բեռը, որ դրուել է միջին, փոքր բիզնեսի վրայ»: Ըստ Վ.Օսկանեանի, կառավարութիւնը պէտք է ուղղակի հայտարարի` «մենք հետեւեալ քայլերն ենք անելու եւ սա չի արուելու ի հաշիւ հարկային քաղաքականութեան խստացման»:

---