Կնքուել է Հայաստանում ոռոգման վեց մայր ջրանցքների
վերականգնման պայմանագիր
19-12-2008 20:00:00 | Հայաստան | Տնտեսութիւն
ԵՐԵՎԱՆ, 19 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: «Հազարամյակի
մարտահրաւեր հիմնադրամ-Հայաստան» (ՀՄՀ-Հայաստան) ՊՈԱԿ-ի,
ֆրանսիական «ՍԱԴ» եւ հայկական «ՇՄՇ-23» ընկերութիւնների
կոնսորցիումի մասնակիցների միջեւ կնքուել է 5,7 միլիոն ԱՄՆ դոլարի
պայմանագիր, որի համաձայն կոնսորցիումը «ՀՄՀ-Հայաստան» ծրագրի
«Ոռոգւող գիւղատնտեսութիւն ենթածրագրի ենթակառուցվածք» բաղադրիչի
շրջանակներում պէտք է իրականացնի վեց մայր ջրանցքների առաջին
փաթեթով նախատեսուած շինարարական աշխատանքները: Պայմանագիրը
ստորագրուել է «ՀՄՀ-Հայաստան»-ի գրասենեակում` գրասենեակի գլխաւոր
գործադիր տնօրէն Արա Յովսէփեանի եւ «ՍԱԴ» ընկերութեան
ներկայացուցիչ Ֆրենսիս Մարկեզի կողմից:
Առաջին փաթեթի շինարարական աշխատանքները կներառեն
Արզնի-Շամիրամ ջրանցքի 4,2 կմ հատուածի առաւել վթարային հատուածների
բետոնէ երեսպատումը եւ վեց մայր ջրանցքների (Արզնի-Շամիրամի,
Արմաւիրի, Արտաշատի, Ստորին Հրազդանի, Շիրակի, Թալինի) առաւել
վթարային հատուածների հիդրոտեխնիկական կառուցուածքների
վերականգնումը: Այդ աշխատանքները կներառեն Արմաւիրի, Արագածոտնի,
Արարատի, Կոտայքի եւ Շիրակի մարզերը ու կմեկնարկեն 2009թ.-ի
յունուարից:
Պայմանագրով նաեւ նախատեսուել է փորձնական ենթաբաղադրիչի
իրականացումը, որը թոյլ կտայ փորձարկել տորկրետային եւ այլ
առաջաւոր տեխնոլոգիաների կիրառումը ջրանցքների շուրջ 200 մետր
հատուածների վրայ: Յաջողութեան դէպքում այդ տեխնոլոգիաները կկիրառուեն
ջրանցքների եւ այլ հիդրո-տեխնիկական կառուցուածքների վերականագնման
շինարարական աշխատանքների ժամանակ: Այս մասին յայտնեցին
«ՀՄՀ-Հայաստան» գրասենեակից: