ՊԵԿԻՆ, 21 ՅՈՒՆՎԱՐԻ, ՆՈՅԵԱՆ ՏԱՊԱՆ: Չինաստանի առողջապահութեան
ոլորտի մասնագէտները նախազգուշացնում են, որ առաջիկայ ամիսներին
երկրում կարող են յաճախակի դառնալ թռչնագրիպով մարդկանց վարակման
դէպքերը:
Բժիշկների մտավախութեան պատճառ է դարձել 16-ամեայ պատանու մահը
երկրի կենտրոնական Խունան նահանգում: Ընդամէնը տարեսկզբից
Չինաստանում թռչնագրիպի վիրուսից երեք մարդ է մահացել: Հաստատուել
է, որ հիւանդութեան զոհերից մէկը` 19-ամեայ մի աղջիկը Պեկինում
մահացել է բադերի հետ շփումից յետոյ:
Հաղորդւում է նաեւ մի նորածնի մասին, որը օրհասական վիճակում
էր գտնւում, սակայն բժիշկներին յաջողուել է յաղթել վիրուսին, եւ
այժմ երեխայի կեանքին ոչինչ չի սպառնում: Մինչդեռ փոքրիկի մայրը
վախճանուել է: Մահուան պաշտօնական պատճառը առայժմ չի նշւում, ըստ
բժիշկների, բոլոր ախտանշանները ցոյց են տալիս, որ կինը մահացել է
թռչնագրիպից:
Չինաստանի գիւղատնտեսութեան նախարարութիւնը հաղորդում է, որ
թռչնագրիպի նշաններ են յայտնաբերուել երկրի մի քանի նահանգների
բնակիչների մօտ, այդ թւում Շանհայում եւ Խունանում: