ՀԱՄԱՇԽԱՐՀԱՅԻՆ ԲԱՆԿԸ ԼՐԱՑՈՒՑԻՉ 20 ՄԼՆ ԴՈԼԱՐԻ ՎԱՐԿ Է
ՅԱՏԿԱՑՐԵԼ ՀԱՅԱՍՏԱՆԻ ՋՐԱՄԱՏԱԿԱՐԱՐՄԱՆ ԵՎ ՋՐԱՀԵՌԱՑՄԱՆ
ԵՆԹԱԿԱՌՈՒՑՈՒԱԾՔՆԵՐԻ ՎԵՐԱԿԱՆԳՆՄԱՆ ՀԱՄԱՐ
31-10-2008 18:00:00 | Հայաստան | Տնտեսութիւն
ԵՐԵՎԱՆ, 31 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Համաշխարհային բանկի
Տնօրէնների խորհուրդը որոշել է 20 մլն ԱՄՆ դոլարի վարկ տրամադրել
Հայաստանի Համայնքային ջրամատակարարման եւ ջրահեռացման ծրագրի
լրացուցիչ ֆինանսաւորման համար: Ըստ ՀԲ-ի Երեւանի գրասենեակի
հաղորդագրութեան, վարկը տրամադրվել է Միջազգային զարգացման
ընկերակցութեան` ՄԶԸ-ի «կոշտացված» պայմաններով. մարման ժամկէտը
կազմում է 20 տարի` արտօնեալ 10 տարին ներառեալ: Նշւում է, որ
սկսած 2006թ. յուլիսի 1-ից Հայաստանը գտնւում է ՄԶԸ-ից դուրս գալու
գործընթացում:
Ընթացիկ ծրագիրն ընդարձակելու համար պահանջւող ՀԲ-ի լրացուցիչ
ֆինանսավորումը ակնկալւում էր դեռ ծրագրի գնահատման ժամանակ, եւ
«Կառավարման պայմանագիրը» պատրաստուել էր վեց տարուայ ծրագրի հիման
վրայ: Ուստի Լրացուցիչ ֆինանսավորումը կօգտագործուի «Կառավարման
պայմանագրի» երկարացման եւ նախկինում առանձնացուած լրացուցիչ
ներդրումների ֆինանսաւորման համար: Այն կօժանդակի Հայաստանի
ջրամատակարարման հատուածի ներդրումային հսկայական կարիքների
բաւարարմանը:
Ծրագիրը նախագծող ՀԲ-ի թիմի ղեկավար Ջոնաթան Կամկվալալան նշել
է, որ ներդրումային ծրագիրն իրականացւում է ըստ ժամանակացոյցի,
իսկ «Հայջրմուղկոյուղու» ջրամատակարարման համակարգերի վերանորոգման
եւ վերականգնման ծրագրի արդիւնքում արդէն լաւացել է ջրի որակը,
աւելացել մաքուր եւ ապահով ջրամատակարարման առկայութիւնը`
ծրագրում ներառուած տարածքներում. խմելու ջրի միջին կշռուած օրական
ժամերի քանակը 2008թ.-ին հասել է 12,2 ժամի` 2004թ.-ի 6 ժամի
դիմաց: Ծրագրի իրականացման արդիւնքում զգալիօրէն լաւացել է նաեւ
«Հայջրմուղկոյուղու» կառուցուածքային եւ ֆինանսական աշխատանքը:
Սակայն, ըստ նրա, ոլորտում դեռ կայ էական ներդրումների կարիք: Այդ
պատճառով ՀԲ-ն կշարունակի օժանդակել ՀՀ կառավարութեանը
ջրամատակարարման եւ ջրահեռացման ծառայութիւնների բարեփոխման
գործում: