ԵՐԵՒԱՆԻ ՋԵԿ-ԻՆ ՀԱՐԱԿԻՑ ՏԱՐԱԾՔՈՒՄ ԿԿԱՌՈՒՑՎԵԼԻՔ ՆՈՐ
ԷՆԵՐԳԱԲԼՈԿԸ ԿԳՈՐԾԱՐԿՈՒԻ 2010 Թ.-ԻՆ
13-09-2008 16:00:00 | Հայաստան | Տնտեսութիւն
ԵՐԵՎԱՆ, 13 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Բնապահպանութեան
նախարարութեան Շրջակայ միջավայրի վրայ ազդեցութեան փորձնաքննության
մասնագիտական իրաւասութեան հաւաստագիր տուող եւ փորձաքննության
եզրակացութիւնը հաստատող յանձնաժողովի սեպտեմբերի 13-ի նիստում
քննարկվեց Երեւանի ջերմաէլեկտրակայանի կողմից ներկայացուած
համակցուած շոգեգազային ցիկլով էներգաբլոկի աշխատանքային նախագիծը:
Ինչպէս նշեց նախարար Արամ Յարութիւնեյանը, Երեւանի ՋԷԿ-ի
տեխնիկական վերազինումն ունի մեծ նշանակութիւն, քանի որ այն
հնարաւորութիւն կտայ նուազեցնել բնապահպանական վնասները:
«Երեւանի ՋԷԿ» ՓԲԸ-ի տնօրէն Հովակիմ Յովհաննիսեանը նշեց, որ
Երեւանի ՋԷԿ-ը շահագործվում է 1962թ.-ից եւ ներկայումս աշխատում է
ոչ լրիւ հզորութեամբ: Ըստ նրա, ՋԷԿ-ի հարակից տարածքում
նախատեսւում է կառուցել նոր էներգաբլոկ` 189 մվտ էլեկտրական եւ 103
Կվտ/ժ ջերմային էներգիայով: Համեմատելով հին եւ նոր ՋԷԿ-երի
ազդեցութիւնը շրջակայ միջավայրի վրայ, Հ.Յովհաննիսեանը նշեց, որ
նորն ունի որոշակի առաւելութիւններ: Այսպէս, նոր էներգաբլոկի
շահագործման արդիւնքում, մասնաւորապէս, զգալիօրէն` տարեկան աւելի
քան 600 հազար տոննայով, կկրճատուի մթնոլորտ արտանետուող ջերմոցային
գազերի ծաւալը, մօտ 39 անգամ կնուազի ածխածնի օքսիդի կոնցենտրացիան:
Հ.Յովհաննիսեանը յայտնեց, որ նոր էներգաբլոկը նախատեսւում է
գործարկել 2010թ.-ի ապրիլին: Այն կկառուցուի Ճապոնիայի Միջազգային
համագործակցութեան բանկի տրամադրած ցածր` 0,75%, տոկասադրույքով
երկարաժամկէտ (40 տարի) 216 մլն դոլար վարկով: