ԵՐԵՎԱՆԻ ՋԵԿ-ԻՆ ՀԱՐԱԿԻՑ ՏԱՐԱԾՔՈՒՄ ԿԿԱՌՈՒՑՎԵԼԻՔ ՆՈՐ
ԷՆԵՐԳԱԲԼՈԿԸ ԿԳՈՐԾԱՐԿՎԻ 2010 Թ.-ԻՆ
13-09-2008 16:00:00 | Հայաստան | Տնտեսություն
ԵՐԵՎԱՆ, 13 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Բնապահպանության
նախարարության Շրջակա միջավայրի վրա ազդեցության փորձնաքննության
մասնագիտական իրավասության հավաստագիր տվող եւ փորձաքննության
եզրակացությունը հաստատող հանձնաժողովի սեպտեմբերի 13-ի նիստում
քննարկվեց Երեւանի ջերմաէլեկտրակայանի կողմից ներկայացված
համակցված շոգեգազային ցիկլով էներգաբլոկի աշխատանքային նախագիծը:
Ինչպես նշեց նախարար Արամ Հարությունյանը, Երեւանի ՋԷԿ-ի
տեխնիկական վերազինումն ունի մեծ նշանակություն, քանի որ այն
հնարավորություն կտա նվազեցնել բնապահպանական վնասները:
«Երեւանի ՋԷԿ» ՓԲԸ-ի տնօրեն Հովակիմ Հովհաննիսյանը նշեց, որ
Երեւանի ՋԷԿ-ը շահագործվում է 1962թ.-ից եւ ներկայումս աշխատում է
ոչ լրիվ հզորությամբ: Ըստ նրա, ՋԷԿ-ի հարակից տարածքում
նախատեսվում է կառուցել նոր էներգաբլոկ` 189 մվտ էլեկտրական եւ 103
Կվտ/ժ ջերմային էներգիայով: Համեմատելով հին եւ նոր ՋԷԿ-երի
ազդեցությունը շրջակա միջավայրի վրա, Հ.Հովհաննիսյանը նշեց, որ
նորն ունի որոշակի առավելություններ: Այսպես, նոր էներգաբլոկի
շահագործման արդյունքում, մասնավորապես, զգալիորեն` տարեկան ավելի
քան 600 հազար տոննայով, կկրճատվի մթնոլորտ արտանետվող ջերմոցային
գազերի ծավալը, մոտ 39 անգամ կնվազի ածխածնի օքսիդի կոնցենտրացիան:
Հ.Հովհաննիսյանը հայտնեց, որ նոր էներգաբլոկը նախատեսվում է
գործարկել 2010թ.-ի ապրիլին: Այն կկառուցվի Ճապոնիայի Միջազգային
համագործակցության բանկի տրամադրած ցածր` 0,75%, տոկասադրույքով
երկարաժամկետ (40 տարի) 216 մլն դոլար վարկով: