ԱԶՕՏԱԿԱՆ ՊԱՐԱՐՏԱՆՅՈՒԹԻ ՇՈՒԿԱՅՈՒՄ ԳԵՐԻՇԽՈՂ ԴԻՐՔ ՈՒՆԵՑՈՂ
«ԴՈՒԻՆ ՀՈԼԴԻՆԳԸ» ՏՈՒԳԱՆՎԵՑ 1 ՄԼՆ ԴՈԼԱՐՈՎ
03-09-2008 18:00:00 | Հայաստան | Տնտեսութիւն
ԵՐԵՎԱՆ, 3 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Տնտեսական
մրցակցութեան պաշտպանութեան պետական յանձնաժողովի սեպտեմբերի 3-ի
նիստում որոշուեց «Դուին Հոլդինգ» ընկերութեանը տուգանել 2007թ.-ի
հասոյթի 2%-ի չափով, բայց ոչ աւելի, քան 300 մլն դրամով (մօտ 1
մլն ԱՄՆ դոլար):
Ինչպէս նիստում յայտնեց յանձնաժողովի նախագահ Աշոտ
Շահնազարեանը, ընկերութեան նկատմամբ յարուցուել էր վարոյթ, որի
ընթացքում պարզուել է, որ ազօտական պարարտանիւթերի շուկայում
գերիշխող դիրք ունեցող «Դուին Հոլդինգ»-ը նպատակաուղղուած
գործողութիւններով կիրառել է չհիմնաւորուած գին`
հողօգտագործողներից բացի այլ անձանց իրացւող ազօտական
պարարտանյութի իրացման գինը 2008թ.-ի մարտին սահմանելով 111430
դրամ, մինչդեռ դրա իրական գինը 84 հազար դրամ է:
Վարոյթի ընթացքում ընկերութիւնը յայտնել է, որ ՀՀ
կառավարութեան որոշման համաձայն Գիւղնախարարութեան հետ կնքել է
պայմանագիր, ըստ որի պարտաւորուել է նախարարութեան կողմից տրուած
գիւղերի ցանկին համապատասխան գիւղատնտեսական արտադրանք
արտադրողներին մատակարարել 20 հազար տոննա ամոնիումային սելիտրա` 1
տոննան 84 հազար դրամով (74 հազ. դրամը վճարում են գիւղական
արտադրանք արտադրողները, իսկ 10 հազարը` որպէս սուբսիդիա, ՀՀ
Գիւղնախարարութիւնը): «Դուին Հոլդինգ»-ի գրութեան համաձայն,
սելիտրա արտադրող գործընկեր վրացական կազմակերպութեան կողմից
զգուշացվել է, որ 2008թ.-ի յունվարի 1-ից արտահանման գինը կտրուկ
աճելու է, եւ այդ պատճառով ընկերութիւնը Գիւղնախարարութեան հետ
կնքուած պայմանագրով մատակարարումը կատարել է մինչեւ 2007թ.-ի
դեկտեմբերի 30-ը:
Նշենք, որ ընկերութիւնը 2007թ.-ի նոյեմբերից մինչեւ 2008թ.-ի
յունիսի 20-ը ներմուծել է 23985 տոննա ամոնիումային սելիտրա, որից
20 հազ. տոննան իրացուել է ՀՀ Գիւղնախարարութեան հետ կնքուած
պայմանագրով, իսկ Գիւղնախարարութեան ցուցակից դուրս իրացրել է
նաեւ 1700 տոննա Արցախում, որից 1000-ի 1 տոննան` 84 հազ. դրամով,
իսկ 700 տոննայի 1 տոննան` 110 հազ. դրամով: Մինչդեռ, ըստ «Դուին
Հոլդինգ»-ի ներկայացրած նիւթերի, հողօգտագործողներին եւ այլ
անձանց համար 1 տոննա ազօտական պարարտանյութի իրացման գնի
կառուցուածքում ձեռքբերման գինը մարտին նոյնն է մնացել:
Արդիւնքում, պարարտանյութի իրացման գինը մարտին կազմել է 111430
դրամ, փետրուարի նկատմամբ աճելով 11430 դրամով, իսկ յունվարի
նկատմամբ` 6430 դրամով, ինչով 1 տոննայից ապահովել է 32318 դրամի
լրացուցիչ շահոյթ: