ՀԱՅԱՍՏԱՆԸ 2007 Թ.-ԻՆ ՊԱՀՊԱՆԵԼ Է ՄԱԿՐՈՏՆՏԵՍԱԿԱՆ ԿԱՅՈՒՆ ԱՃԸ,-
ԱՍՈՒԱԾ Է ԵՎՐՈՀԱՆՁՆԱԺՈՂՈՎԻ ԶԵԿՈՅՑՈՒՄ
11-07-2008 18:30:00 | Հայաստան | Տնտեսութիւն
ԵՐԵՎԱՆ, 11 ՅՈՒԼԻՍԻ, ՆՈՅԵԱՆ ՏԱՊԱՆ: Հայաստանը 2007թ.-ին
պահպանել է մակրոտնտեսական կայուն աճը. տնտեսական աճի արձանագրուած
երկնիշ ցուցանիշը հիմնականում պայմանաւորուած է երկրում իրականացyող
շինարարութեան եւ ծառայութիւնների ոլորտներում գրանցուած աճով,
ինչպէս նաեւ արտերկրում աշխատող հայերի կողմից կատարւող
փոխանցումներով: Այս մասին նշուած է 2007թ.-ին Հայաստանի վերաբերեալ
Եւրոպական յանձնաժողովի (ԵՀ) զեկոյցում, որը յուլիսի 11-ին
Երեւանում կազմակերպուած «Եւրոպական հարեւանութեան քաղաքականութեան
գործողութիւնների ծրագրի մոնիտորինգ» թեմայով քննարկմանը
ներկայացրեց ՀՀ արտգործնախարարութեան ԵՄ բաժնի առաջին քարտուղար
Լուսինէ Մովսիսեանը:
Նրա խօսքերով, նախորդ տարիների համամատ 2007թ.-ին Հայաստանը
բարելաւել է իր գործարար միջավայրը, սակայն ներդրումային ոլորտի
բարելաւման ուղղութեամբ դեռեւս աշխատանքներ պէտք է իրականացուեն:
Զեկոյցի համաձայն, Հայաստանի հարկային համակարգում նույնպես
առաջընթաց է գրանցուել, ինչը խրախուսւում է ԵՄ-ի կողմից: Ըստ
Լ.Մովսիսեանի, ԵՄ-ն յորդորում է ՀՀ իշխանութիւններին շարունակել
հարկային համակարգի եւ վարչարարության բարեփոխումները, միաժամանակ
առաջարկում է գործարար միջավայրի համար ստեղծել հարկերի
հաւաքագրման խորհրդակցական մարմին:
Լ.Մովսիսեանը յայտնեց, որ էներգետիկայի ոլորտում իրականացուած
բարեփոխումները նույնպես խրախուսւում են ԵՄ-ի կողմից:
Մասնաւորապէս, 2007թ.-ին ընդունուել է էներգետիկ նոր ռազմավարութեան
վերաբերեալ փաստաթուղթ եւ գործողութիւնների ծրագիր: Բացի դրանից,
նախորդ տարի բարձրացուել է Մեծամօրի ատոմակայանի անվտանգութիւնը եւ
ընդլայնվել ատոմակայանի օգտագործման բնագաւառը կարգաւորող մարմնի
իրաւասութիւնները: Ըստ Լ.Մովսիսեանի, Հայաստանը նախատեսում է
կառուցել նոր ատոմակայան եւ հնարաւոր է, որ ԵՄ-ն ատոմակայանի
կառուցման համար վարկ տրամադրի: «Եւրոպայի համար ատոմակայանի
կառուցումը նույնպես կարեւորւում է, քանի որ գազի եւ նաւթի
թանկացումների հետ անվտանգ միջուկային էներգիայի դերակատարումն
աշխարհում մեծացել է»,- նշեց Լ.Մովսիսեանը: