ՀԱՅԱՍՏԱՆԸ 2007 Թ.-ԻՆ ՊԱՀՊԱՆԵԼ Է ՄԱԿՐՈՏՆՏԵՍԱԿԱՆ ԿԱՅՈՒՆ ԱՃԸ,-
ԱՍՎԱԾ Է ԵՎՐՈՀԱՆՁՆԱԺՈՂՈՎԻ ԶԵԿՈՒՅՑՈՒՄ
11-07-2008 18:30:00 | Հայաստան | Տնտեսություն
ԵՐԵՎԱՆ, 11 ՀՈՒԼԻՍԻ, ՆՈՅՅԱՆ ՏԱՊԱՆ: Հայաստանը 2007թ.-ին
պահպանել է մակրոտնտեսական կայուն աճը. տնտեսական աճի արձանագրված
երկնիշ ցուցանիշը հիմնականում պայմանավորված է երկրում իրականացվող
շինարարության եւ ծառայությունների ոլորտներում գրանցված աճով,
ինչպես նաեւ արտերկրում աշխատող հայերի կողմից կատարվող
փոխանցումներով: Այս մասին նշված է 2007թ.-ին Հայաստանի վերաբերյալ
Եվրոպական հանձնաժողովի (ԵՀ) զեկույցում, որը հուլիսի 11-ին
Երեւանում կազմակերպված «Եվրոպական հարեւանության քաղաքականության
գործողությունների ծրագրի մոնիտորինգ» թեմայով քննարկմանը
ներկայացրեց ՀՀ արտգործնախարարության ԵՄ բաժնի առաջին քարտուղար
Լուսինե Մովսիսյանը:
Նրա խոսքերով, նախորդ տարիների համամատ 2007թ.-ին Հայաստանը
բարելավել է իր գործարար միջավայրը, սակայն ներդրումային ոլորտի
բարելավման ուղղությամբ դեռեւս աշխատանքներ պետք է իրականացվեն:
Զեկույցի համաձայն, Հայաստանի հարկային համակարգում նույնպես
առաջընթաց է գրանցվել, ինչը խրախուսվում է ԵՄ-ի կողմից: Ըստ
Լ.Մովսիսյանի, ԵՄ-ն հորդորում է ՀՀ իշխանություններին շարունակել
հարկային համակարգի եւ վարչարարության բարեփոխումները, միաժամանակ
առաջարկում է գործարար միջավայրի համար ստեղծել հարկերի
հավաքագրման խորհրդակցական մարմին:
Լ.Մովսիսյանը հայտնեց, որ էներգետիկայի ոլորտում իրականացված
բարեփոխումները նույնպես խրախուսվում են ԵՄ-ի կողմից:
Մասնավորապես, 2007թ.-ին ընդունվել է էներգետիկ նոր ռազմավարության
վերաբերյալ փաստաթուղթ եւ գործողությունների ծրագիր: Բացի դրանից,
նախորդ տարի բարձրացվել է Մեծամորի ատոմակայանի անվտանգությունը եւ
ընդլայնվել ատոմակայանի օգտագործման բնագավառը կարգավորող մարմնի
իրավասությունները: Ըստ Լ.Մովսիսյանի, Հայաստանը նախատեսում է
կառուցել նոր ատոմակայան եւ հնարավոր է, որ ԵՄ-ն ատոմակայանի
կառուցման համար վարկ տրամադրի: «Եվրոպայի համար ատոմակայանի
կառուցումը նույնպես կարեւորվում է, քանի որ գազի եւ նավթի
թանկացումների հետ անվտանգ միջուկային էներգիայի դերակատարումն
աշխարհում մեծացել է»,- նշեց Լ.Մովսիսյանը: