ՀՀ փոխվարչապետն ընդունեց Իտալիայի Վենետո նահանգի Տրեվիզո
մարզի պատուիրակութեանը
25-02-2010 21:30:00 | Հայաստան | Տնտեսութիւն
ԵՐԵՎԱՆ, 25 ՓԵՏՐՈՒԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: ՀՀ
փոխվարչապետ, տարածքային կառավարման նախարար Արմէն Գեւորգեանը
փետրուարի 25-ին ընդունեց Իտալիայի Վենետո նահանգի Տրեվիզո մարզի
պատուիրակութեանը: ՀՀ տարածքային կառավարման նախարարութիւնից
ստացուած հաղորդագրութեան համաձայն, հանդիպմանը մասնակցում էին նաեւ
Հայաստանում Իտալիայի արտակարգ եւ լիազօր դեսպան Բրունօ Սկապինին
եւ Վայոց ձորի մարզպետ Վարդգէս Մաթեւոսեանը:
Փոխվարչապետը նշեց, որ հայկական կողմը
հետաքրքրուած է համագործակցութեան հեռանկարներով. յատկապէս կարող է
օգտակար լինել Հիւսիսային Իտալիայի տնտեսական զարգացման մոդելը,
քանի որ Հայաստանի հետ կան մի շարք ընդհանրություններ` թէ
տնտեսական հնարաւորութիւնների, թէ տարածքի առումով:
Դեսպան Բ. Սկապինին նշեց, որ հայ-իտալական
ձեւաւորուած բարեկամական յարաբերութիւնները կարող են վերաճել աւելի
սերտ գործակցութեան: Նշուեց, որ պատուիրակութիւնը հետաքրքրուած է
գիւղատնտեսական բնագաւառում համագործակցութեամբ, մասնաւորապէս`
այգեգործության եւ գինեգործութեան ոլորտում:
Տրեվիզոյի մարզը ոչ միայն Իտալիայում, այլեւ աշխարհում
համարւում է գինեգործութեան ոլորտի առաջատարներից, եւ իտալական
կողմը պատրաստ է իր փորձը փոխանցել Հայաստանին: Դեսպանը
վստահութիւն յայտնեց, որ հայկական կողմի հետ կյաջողուի իրականացնել
երկուստեք փոխշահավետ ծրագրեր:
Տրեվիզոյի մարզային խորհրդի նախագահ Պետենա Ֆուլվիոն
տեղեկութիւններ ներկայացրեց մարզի գիւղատնտեսական եւ արտադրական
պոտենցիալի վերաբերեալ. մարզում զարգացած է ինտենսիվ տիպի
գիւղատնտեսութիւնը, գիւղատնտեսական արտադրութիւնը ոչ թէ
մասսայական է, այլ մասնագիտացուած: Կարողացել են նաեւ հաջողութեամբ
համադրել արտադրութիւնն ու տուրիզմը: Նա տեղեկացրեց, որ 2007թ-ից
Հայաստանի հետ ունեն համագործակցութեան ծրագիր, որի շրջանակում
յաջողուել է գինեգործութեան ոլորտում փոխգործակցութան հիմքեր
ստեղծել, եւ այն ընդլայնելու ցանկութիւն յայտնեց:
Փոխվարչապետը նկատեց, որ Տրեվիզոյի տնտեսավարման մոդելը
ամենաօպտիմալը կարող է լինել Հայաստանի գյուղատնետսության
զարգացման համար: Այս առումով նա առանձնացրեց Վայոց ձորի մարզը,
որտեղ եւ գինեգործութեան աւանդոյթներ կան, եւ հնարաւորութիւններ`
տուրիզմի զարգացման համար: Նա հոյս յայտնեց, որ կյաջողուի կոնկրետ
ծրագրեր կեանքի կոչել:
Դեսպան Բ. Սկապինին ներկայացրեց նաեւ հայ-իտալական առեւտրային
պալատ ստեղծելու վերաբերեալ իր նախաձեռնութիւնը: Պալատը կարող է
անդամակցել նաեւ Իտալիայի` այլ երկրների հետ նմանատիպ պալատները
միաւորող ասոցիացիային, որն էլ կարող է հարթակ լինել` փորձի,
գիտելիքների փոխանակման, համատեղ ծրագրերի իրականացման համար:
Ա. Գեւորգեանն իր կողմից ամենայն աջակցութեան
պատրաստակամութիւն յայտնեց:
Իտալացի հիւրերը նաեւ նշեցին, որ Հայաստան այցելելու
պատճառներից մէկն էլ Հայոց ցեղասպանութեան զոհերի յիշատակին
յարգանքի տուրք մատուցելն է: