ՀՌՈՄ, 23 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Իտալիայի վարչապետ Սիլվիո
Բերլուսկոնին այս անգամ կհրաւիրուի Միլանի դատարան որպէս վկայ եւ
կհարցաքննուի Աբու Օմար անունով յայտնի եգիպտացի իսլամական իմամի
առեւանգման գործի առնչութեամբ: Այս որոշումն է ընդունել դատաւոր
Օսկար Մաջին:
Սիլվիո Բերլուսկոնին իմամի առեւանգման պահին (2003 թ.), ինչի
մէջ մեղադրում են ԿՀՎ եւ Իտալիայի ռազմական հետախուզութեան
աշխատակիցներին, զբաղեցնում էր երկրի վարչապետի պաշտօնը: Նա պէտք է
պատասխան տայ, թէ ինչ հրահանգներ է ստացել ռազմական հետախուզութեան
ծառայութեան այն ժամանակուայ ղեկավար Նիկոլա Պոլլարին, որի
փաստաբաններն էլ պահանջում են դատարան հրաւիրել վարչապետին: Սակայն
Բերլուսկոնին յայտարարում է, որ իր կառավարութիւնը տեղեակ չի եղել
Իտալիայի տարածքում որեւէ գաղտնի գործողութեան: ԱՄՆ-ը եւս
հրաժարուել է իտալական արդարադատութեանը յանձնել իր աշխատակիցներին,
որոնց թւում եւ Հռոմի եւ Միլանի ամերիկեան յատուկ ծառայութիւնների
տարածաշրջանային ղեկավարներին` ժխտելով երրորդ երկրներում
հակաահաբեկչական գործողութիւնների անցկացման փաստը: