2009 Թ.-Ի ՅՈՒՆՈՒԱՐԻՑ ՆԱԽԱՏԵՍՒՈՒՄ Է 3 ՄԼՆ ԴՐԱՄԸ ԳԵՐԱԶԱՆՑՈՂ
ԳՈՐԾԱՐՔՆԵՐԸ ԻՐԱԿԱՆԱՑՆԵԼ ԱՆԿԱՆԽԻԿ
04-04-2008 18:00:00 | Հայաստան | Տնտեսութիւն
ԵՐԵՎԱՆ, 4 ԱՊՐԻԼԻ, ՆՈՅԵԱՆ ՏԱՊԱՆ: ՀՀ կառավարութեան ապրիլի 4-ի
նիստում հաւանութիւն է տրուել «Կանխիկ գործառնութիւնների
սահմանափակման մասին» օրէնքի նախագծին: Ինչպէս նիստից յետոյ
լրագրողներին յայտնեց ՀՀ Կենտրոնական բանկի խորհրդի անդամ Վաչէ
Գաբրիէլեանը, նախագծով սահմանւում է, թէ որ գործարքները եւ
գործառնութիւնները պէտք է իրականացուեն անկանխիկ: Ըստ նրա,
օրինագիծն ակնյայտօրէն միտուած է ստուերային տնտեսութեան դէմ
պայքարին:
Վ.Գաբրիէլեանի խօսքերով, նախատեսւում է անկանխիկ իրականացնել
ապրանքների օտարման, օգտագործման, աշխատանքների կատարման եւ
ծառայութիւնների մատուցման բոլոր այն գործարքները, որոնց արժէքը
գերազանցում է որոշակի գումարը: Մասնաւորապէս, 2009թ.-ի յունվարի
1-ից սկսած 3 մլն դրամը (մօտ 9,7 հազար ԱՄՆ դոլար), 2010թ.-ից` 2
մլն դրամը, իսկ 2011թ.-ից 1 մլն դրամը գերազանցող բոլոր
գործարքները պէտք է կատարուեն անկանխիկ կերպով: Բացի այդ, 2009թ.-ի
յունուարից Երեւանում, 2010թ.-ից` մարզկենտրոններում, իսկ 2011թ.-ից
մնացած բնակավայրերում 60 հազար դրամը գերազանցող աշխատավարձը պէտք
է վճարուի անկանխիկ: Ըստ Վ.Գաբրիէլեանի, սահմանափակումներ կան նաեւ
կրթաթոշակների, ուսման վարձի, բժշկական ծառայութիւնների վճարների
վերաբերեալ: