Ազգային անվտանգութեան խորհրդի քարտուղար Արթուր Բաղդասարեանը մայիսի 24-ին ընդունել է Եւրամիութեան արտաքին սահմանների օպերատիւ կառավարման գործակալութեան (FRONTEX) գործադիր տնօրէնի յատուկ հարցերով խորհրդական Գրահամ Լիզին եւ արտաքին յարաբերութիւնների պատասխանատու Ռիկ Վեյջերմանսին:
Արթուր Բաղդասարեանի նախորդ տարուայ նոյեմբերին Վարշաւայ կատարած այցի ընթացքում գործակալութեան գլխաւոր տնօրէնի հետ պայմանաւորուածութիւն էր ձեռք բերուել համագործակցութիւն սկսել Հայաստանի եւ FRONTEX-ի միջեւ, որի արդիւնքը պէտք է լինի տեխնիկական համագործակցութեան մասին համաձայնագրի ստորագրումը:
Գործակալութիւնը առանցքային դերակատարում ունի սահմանների կառավարման ինտէգրուած մոդելի զարգացման գործում` ապահովելով Եւրամիութեան արտաքին սահմանների անվտանգութիւնը, ինչպէս նաեւ` նպաստելով երրորդ երկրների հետ համագործակցութեան զարգացման եւ միգրացիոն հոսքերի նպատակաուղղուած կառավարման գործընթացներին:
Գործակալութիւնը սերտ համագործակցում է Եւամիութեան եւ նրա արտաքին սահմանների անվտանգութեան համար պատասխանատու մարմինների հետ, մասնաւորապէս` Եւրոպոլի, մաքսային, ֆիտոսանիտարական եւ անասնապահական հսկողութեան, ներքին եւ սահմանային անվտանգութեան համար պատասխանատու իրաւապահ մարմինների:
Հանդիպման ընթացքում քննարկուել էն նշուած ոլորտներում համագործակցութեան հնարաւորութիւնները:
Պայմանաւորուածութիւն է ձեռք բերուել սեպտեմբերին ստորագրել երկկողմ համագործակցութեան համաձայնագիր, որը հնարաւորութիւն կը տայ իրականացնել համատեղ օպերացիաներ եւ պիլոտային ծրագրեր: Արթուր Բաղդասարեանը նշել է, որ համաձայնագրի ստորագրումը մեծ նշանակութիւն կ'ունենայ ԵՄ չափանիշներին համապատասխան ենթակառուցուածքներ ունենալու, սերտիֆիկացուած լաբորատորիաներ ձեւաւորելու, ինչպէս նաեւ` արհեստավարժ կադրեր պատրաստելու համար:
Գործակալութիւնն արդէն համագործակցութեան երկկողմ համաձայնագրեր է կնքել ԵՄ անդամ 13 երկրների հետ, որոնք ներառուած էն Շէնգենեան գօտում:
Ազգային անվտանգութեան խորհրդի քարտուղարի մամուլի գրասենեակ