2008 Թ.-Ի ԱՌԱՋԻՆ ԿԻՍԱՄԵԱԿՈՒՄ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՀՀ ՊԵՏԲԻՒՋԷԻ ՀԱՐԿԱՅԻՆ ԵԿԱՄՈՒՏՆԵՐԸ
34,9%-ՈՎ ԱՃԵԼ ԵՆ
16-08-2008 18:52:00 | Հայաստան | Տնտեսութիւն
ԵՐԵՎԱՆ, 16 ՕԳՈՍՏՈՍԻ, ՆՈՅԵԱՆ ՏԱՊԱՆ: 2008թ.-ի առաջին
կիսամեակում ՀՀ պետական բիւջէի հարկային եկամուտները կազմել են
աւելի քան 275 մլրդ դրամ (մօտ 894,1 մլն ԱՄՆ դոլար), ինչով
կիսամեակային ծրագիրն ապահովել է 105,1%-ով, իսկ տարեկան ծրագիրը`
47,3%-ով: 2007թ.-ի նոյն ժամանակահատուածի համեմատ հարկային
եկամուտներն աճել են 34,9%-ով կամ 71,1 մլրդ դրամով: Ընդ որում,
գրեթէ բոլոր հարկատեսակների գծով (բացառութեամբ պարզեցուած հարկի)
արձանագրուել են աճի բարձր տեմպեր:
ՀՀ Ֆինանսների նախարարութեան լրատուական ծառայութեան
տուեալներով, այս տարուայ հունվա-յունիսին աւելացուած արժէքի հարկը
կազմել է աւելի քան 141,6 մլրդ դրամ, ինչը կազմել է հարկային
եկամուտների 51,5%-ը: Նշուած գումարից 88,4 մլրդ դրամը ստացուել է ՀՀ
սահմանին հարկումից, 53,2 մլրդ դրամը` ապրանքների եւ
ծառայութիւնների ներքին շրջանառութիւնից: 2007թ.-ի նոյն
ժամանակահատուածի համեմատ պետական բիւջէ մուտքագրուած ԱԱՀ-ն աճել է
46,3%-ով կամ շուրջ 44,8 մլրդ դրամով: Ընդ որում, աւելացել են ե'ւ
ներկրումից, ե'ւ ներքին շրջանառութիւնից ստացւող գումարները:
Այս տարուայ առաջին կիսամեակում ակցիզային հարկի մուտքերը
կազմել են շուրջ 20,9 մլրդ դրամ, ինչով ապահովել է հարկային
եկամուտների 7,6%-ը: Մասնաւորապէս, հանրապետութիւն ներկրուած
ենթաակցիզային ապրանքների հարկումից ստացուել է շուրջ 14,2 մլրդ
դրամ, որից 6,3 մլրդ դրամը` բենզինի եւ դիզելային վառելիքի, 5,8
մլրդ դրամը` ծխախոտի ներկրումից:
Հանրապետութիւնում արտադրուող ենթաակցիզային ապրանքների
հարկումից պետական բիւջէի մուտքերը կազմել են 6,7 մլրդ դրամ, որից
շուրջ 3 մլրդ դրամը ստացուել է ներքին արտադրութեան ծխախոտի
իրացումից:
Նախորդ տարուայ նոյն ժամանակահատուածի համեմատ ակցիզային հարկի
մուտքերն աճել են 16,9%-ով կամ աւելի քան 3 մլրդ դրամով, ինչը
հիմնականում պայմանաւորուած է բենզինի ու ծխախոտի ներկրման եւ
տեղական արտադրութեան ծխախոտի իրացման գծով մուտքերի աճով:
Ակցիզային հարկի աճ է արձանագրուել նաեւ ներկրւող եւ տեղական
արտադրութեան ալկոհոլային խմիչքների գծով: