ՀԱՅԱՍՏԱՆՈՒՄ 110 ԿՎ ԵՆԹԱԿԱՅԱՆՆԵՐԻ ՎԵՐԱԿԱՆԳՄԱՆ ՄԻՋԱԶԳԱՅԻՆ
ՄՐՑՈՅԹՈՒՄ ՅԱՂԹՈՂ Է ՃԱՆԱՉՈՒԵԼ «HPCC» ՉԻՆԱԿԱՆ ԸՆԿԵՐՈՒԹԻՒՆԸ
01-08-2008 16:42:00 | Հայաստան | Տնտեսութիւն
ԵՐԵՎԱՆ, 1 ՕԳՈՍՏՈՍԻ, ՆՈՅԵԱՆ ՏԱՊԱՆ: Հայաստանում 110 կվ
ենթակայանների վերականգնման միջազգային մրցոյթում, որին մասնակցել
են 6 կազմակերպութիւններ, յաղթող է ճանաչուել «HPCC» չինական
ընկերութիւնը: Օգոստոսի 1-ին ՀՀ էներգետիկայի եւ բնական պաշարների
նախարարութիւնում «HPCC»-ի եւ «Էներգաինվեստ ԾԻԳ» ՊՀ-ի միջեւ
ստորագրուեց գլխաւոր կապալի պայմանագիրը:
Ծրագիրն իրականացւում է ՀՀ կառավարութեան եւ Միջազգային
համագործակցութեան ճապոնական բանկի միջեւ կնքուած «Էլեկտրահաղորդման
եւ բաշխիչ համակարգեր» վարկային համաձայնագրի շրջանակներում: Ըստ
համաձայնագրի, ՀՀ կառավարութեանը տրամադրվել է 5 մլրդ 399 մլն
ճապոնական իեն` SCADA/կապի համակարգի առաջին փուլի իրականացման եւ
110 կվ ենթակայանների վերականգնման նպատակով:
Չինական ընկերութեան հետ կնքուած պայմանագրի գումարը կազմում է
3,56 մլրդ ճապոնական իեն: Աշխատանքները նախատեսւում է աւարտել
2010թ.-ի սեպտեմբերին: Մրցոյթով նախատեսւում է վերականգնել 110 կվ
13 ենթակայան: Սակայն, հաշուի առնելով ենթակայանների վերականգնման
համար ծրագրի բիւջէով նախատեսուած գումարի եւ ամենացածր գնահատուած
«HPCC» ընկերութեան առաջարկի գնի տարբերութիւնը, նպատակահարմար է
համարուել մրցոյթի արդիւնքում խնայուած միջոցներով վերականգնել
առաւել խնդրահարույց եւս 4 ենթակայաններ` անփոփոխ թողնելով
պայմանագրի իրականացման ժամկէտը եւ մրցութային առաջարկի միաւոր
գները:
Այսպիսով, տուեալ վարկային ծրագրի շրջանակներում կվերականգնուեն
17 ենթակայաններ, այդ թւում 12-ը` Եւեանում: Նշուած ենթակայաններում
նախատեսւում է փոխարինել 110 կվ եւ 35 կվ բաց բաշխիչ կայանքների
բոլոր անջատիչները, բաժանիչները, հոսանքի եւ լարման
տրանսֆորմատները, գերլարման սահմանափակիչները եւ 10(6) կվ
բջիջները: Փոխարինվելու են նաեւ 110, 35 կվ միացութիւնների եւ
10(6) կվ բջիջների ռելեական պաշտպանութեան սարքաւորումները:
Իւրաքանչիւր ենթակայանում տեղադրուելու է համակարգիչ, որի միջոցով
իրականացուելու է 10(6) կվ բջիջների վերահսկումը եւ ղեկավարումը:
Ծրագրի իրականացման արդիւնքում կկրճատուեն նշուած ենթակայաններում
տեխնիկական կորուստները, կնուազեն շահագործման ծախսերը, կբարձրանայ
կառավարելիության մակարդակը: