ՀԱՅԱՍՏԱՆ-ԻՐԱՆ ԵՐԿԱԹՈՒՂՈՒ ԿԱՌՈՒՑՄԱՆ ՇՈՒՐՋ ԲԱՆԿՑՈՒԹՅՈՒՆՆԵՐԸ
ՇԱՐՈՒՆԱԿՒՈՒՄ ԵՆ
01-08-2008 16:08:00 | Հայաստան | Տնտեսութիւն
ԵՐԵՎԱՆ, 1 ՕԳՈՍՏՈՍԻ, ՆՈՅԵԱՆ ՏԱՊԱՆ: Այս տարուայ յունիսի 1-ից
«Հայկական երկաթուղի» ՓԲԸ-ն («Հարաւկովկասեան երկաթուղիներ») 30
տարով կոնցեսիոն կառավարման է յանձնուել «Ռուսաստանի երկաթուղիներ»
ՓԲԸ-ին, որը պարտաւորուել է այդ տարիների ընթացքում համակարգում
ներդնել շուրջ 174,5 մլրդ դրամ, ընդ որում 59,3 մլրդ դրամը`
առաջիկայ հինգ տարիներին: Շարժակազմի ձեռք բերման համար
ընկերութիւնը նախատեսել է ներդնել 8 մլրդ դրամ: Այս մասին
օգոստոսի 1-ի ասուլիսում յայտնեց ՀՀ տրանսպորտի եւ կապի նախարար
Գուրգէն Սարգսեանը:
Ըստ նրա, միջքաղաքային երկաթուղային հաղորդակցութիւնը
զարգացնելու նպատակով կառավարչի կողմից արդէն ձեռք են բերուել հինգ
էլեկտրագնացքներ, ինչը հնարաւորութիւն կտայ օգոստոսի 2-ից
վերաբացել Գիւմրի-Պեմզաշեն-Արթիկ, Երեւան-Երասխ, իսկ օգոստոսի
3-ից` Գիւմրի-Երեւան կանոնաւոր ուղերթները: Նշուեց, որ յուլիսի
12-ից իրականացւում է Երեւան-Ծովագիւղ ուղերթը: Բացի այդ, 1000
բեռնատար վագոնների եւ 23 էլեկտրագնացքների վերանորոգման համար
«Հարաւկովկասեան երկաթուղիներ»-ն արդէն պայամանգիր են կնքել
վրացական ընկերութեան հետ:
Գ.Սարգսեանը յայտնեց նաեւ, որ Իրան-Հայաստան երկաթուղու
կառուցման շուրջ եռակողմ` Հայաստան, Իրան, Ռուսաստան,
բանակցութիւնները դեռ շարունակւում են: Նշուեց, որ Հայաստանում
գործունէութիւն իրականացնող միջազգային ֆինանսական
կազմակերպութիւնները նույնպես դրական են գնահատում այդ քայլը եւ
նոյնիսկ պատրաստ են մասնակցել ծրագրի համաֆինանսաւորմանը: