ՄԵԾԱՑԵԼ ԵՆ ATLANTIK FORFAITERIUNGS AG-Ի ԿՈՂՄԻՑ
«ԱՐԴՇԻՆԻՆՎԵՍՏԲԱՆԿ»-ԻՆ ՏՐԱՄԱԴՎՈՂ ԱՐՏԱՔԻՆ ԱՌԵՎՏՐԻ ՖԻՆԱՆՍԱՒՈՐՄԱՆՆ
ՈՒՂՂՈՒԱԾ ՎԱՐԿԱՅԻՆ ԳԾԻ ՉԱՓԸ ԵՎ ԺԱՄԿԷՏՆԵՐԸ
15-07-2008 14:56:00 | Հայաստան | Տնտեսութիւն
ԵՐԵՎԱՆ, 15 ՅՈՒԼԻՍԻ, ՆՈՅԵԱՆ ՏԱՊԱՆ: Շուեցարական Atlantik
Forfaiterungs AG ընկերութեան կողմից «Արդշինինվեստբանկ»-ին
տրամադրուող արտաքին առեւտրի ֆինանսաւորմանն ուղղուած վարկային գծի
սահմանաչափը մեծացուել է` կազմելով 2,5 մլն ԱՄՆ դոլար, մինչեւ 5
տարի մարման ժամկէտով: Ըստ «Արդշինինվեստբանկ» ՓԲԸ-ի մամլոյ
ծառայութեան հաղորդագրութեան, վարկային գծի պայմանների վերանայման
մասին որոշումն ընդունուել է յունիսի 16-ին Atlantik Forfaiterungs
AG ընկերութեան տնօրէն Պիտեր Դորնաուերի հետ կայացած
բանակցութիւններից յետոյ:
Atlantik Forfaiterungs AG ընկերութիւնը, որի հետ
«Արդշինինվեստբանկ»-ը համագործակցում է 2006 թուականից, զբաղւում է
արտահանման եւ ներմուծման կարճաժամկէտ, միջնաժամկէտ եւ երկաժամկետ
գործունէութեան ֆինանսավորմամբ: Այն հանդիսանում է եւրոպական
ֆորֆեյթինգային շուկայի առաջատար եւ փորձառու ընկերութիւններից
մէկի` German Oetker Group կազմակերպութեան, անդամ, որը 1960-ական
թուականներից ակտիւ գործունէութիւն է իրականացնում բանկային,
ապահովագրական, սննդի արդիւնաբերութեան եւ հիւրանոցային բիզնեսի
ոլորտներում:
Արդշինինվեստբանկի վարչութեան նախագահ Արամ Անդրէասեանի
խօսքերով, «համագործակցութիւնը նմանատիպ փորձառու
կազմակերպութիւնների հետ հնարաւորութիւն է տալիս է'լ աւելի
բարձրացնել մեր յաճախորդների սպասարկման մակարդակը, մատուցել
եւրոպական ամենաբարձր չափանիշներին համապատասխան ֆինանսական
ծառայութիւններ` պահպանելով «Արդշինինվեստբանկ»-ի ՀՀ բանկային
շուկայում ձեռք բերած վստահելի եւ կայուն բանկի համբավը»: