ԸՍՏ «ՄԻՋԱԶԳԱՅԻՆ ՀԱՄԱՆԵՐՈՒՄ» ԿԱԶՄԱԿԵՐՊՈՒԹԵԱՆ, ՀԱՅԱՍՏԱՆԸ
ԽՈՇՏԱՆԳՈՒՄՆԵՐ ԿԻՐԱՌՈՂ 81 ԵՐԿՐՆԵՐԻ ՇԱՐՔՈՒՄ Է
27-06-2008 17:08:00 | Հայաստան | Մարդու իրաւունքներ
ԵՐԵՎԱՆ, 27 ՅՈՒՆԻՍԻ, ՆՈՅԵԱՆ ՏԱՊԱՆ: Եվրոմիությունը ամէն տարի
11-12 մլն եւրօ գումար է յատկացնում աշխարհում խոշտանգումների
կանխարգելման եւ խոշտանգումներից տուժածներին աջակցելու նպատակով:
Ցանկացած տեսակի խոշտանգումները, ինչպէս նաեւ մարդու նկատմամբ
նուաստացնող վերաբերմունքը բացառելուն ուղղուած պայքարը Եւրոմիութեան
առաջնահերթություններից մէկն է: Այս մասին Խոշտանգման զոհերի
միջազգային աջակցման օրուան նուիրուած յունիսի 27-ի ասուլիսում նշեց
Հայաստանում Եւրոպական յանձնաժողովի պատուիրակութեան ղեկավար,
դեսպան Ռաուլ դե Լուցենբերգերը:
Ըստ նրա, խոշտանգումների դէմ պայքարը իրականացւում է իրավապահ
մարմինների եւ զինուած ուժերի ներկայացուցիչների ուսուցման եւ
վերապատրաստման ծրագրեր իրականացնելու, հանրութեանը իրազեկելու,
խոշտանգումներից տուժածներին աջակցութիւն ցոյց տալու միջոցով:
Եվրոմիությունում նախագահող երկրի` Ֆրանսիայի, ՀՀ-ում
արտակարգ եւ լիազօր դեսպան Սերժ Սմեսոֆն իր հերթին նշեց, որ
խոշտանգումների դէմ պայքարը իրականացւում է միջազգային մի շարք
համաձայնագրերի, միջազգային կազմակերպութիւնների կամ
տարածաշրջանային ծրագրերի շրջանակում: Այսօրուայ դրութեամբ, ըստ
«Միջազգային համաներում» կազմակերպութեան տուեալների, աշխարհում կայ
81 երկիր, որտեղ խոշտանգումները կիրառւում են: Դրանց թւում է նաեւ
Հայաստանը:
«Մենք կողջունեինք, եթէ Հայաստանը վավերացներ Միջազգային
քրէական դատարանի Հռոմի կանոնադրութիւնը, որը եւս լրացուցիչ
գործիք է խոշտանգումների դէմ պայքարելու համար»,- ասաց Հայաստանում
Եւրոպական յանձնաժողովի պատուիրակութեան ղեկավար, դեսպան Ռաուլ դե
Լուցենբերգերը: «Հայոց ցեղասպանութիւնը զանգվածային խոշտանգու՞մ
է» հարցին ի պատասխան նա նշեց. «Դրանք ողբերգական
իրադարձութիւններ են եւ մեծամասամբ` արդէն անցեալում, եւ սա այն
տեղը չէ, որ մենք պէտք է դա քննարկենք»:
Ֆրանսիայի դեսպանատան անմիջական հարեւանութեամբ մարտի 1-ի
ոստիկանական գործողութիւններում կայ՞ն արդեօք խաղաղ ցուցարարների
հանդէպ խոշտանգումների տարրեր հարցին ի պատասխան Ֆրանսիայի դեսպանը
ասաց. «Բռնարարքները, բռնութեան, ուժի գործադրումները, որոնք տեղի
են ունեցել այդ ընթացքում եւ դրանից յետոյ, դրանք այն տարատեսակի
գործողութիւնները չեն, որոնք կարող են դասվել խոշտանգումների
շարքին: Անշուշտ, այդ ամէնը ցավալի է, կարելի է զղջալ կատարուածի
համար, բայց դա խոշտանգում չէ»,- ասաց Սերժ Սմեսոֆը: