ԵՐԵՎԱՆ, 31 ՅՈՒՆՎԱՐԻ, ՆՈՅԵԱՆ ՏԱՊԱՆ: ՀՀ նախագահ Ռոբերտ Քոչարեանը յունվարի 31-ին ընդունել է տեղեկատուական տեխնոլոգիաների ոլորտում աշխարհի առաջատար ընկերութիւններից մէկի` ֆրանսիական «ալկատել-Լյուսենտ» ընկերութեան, նախագահ Սերժ Չուրուքին եւ «Նայթ Բրիջ» հոլդինգի նախագահ, ՀՀ նախկին վարչապետ Արմէն Սարգսեանին: Ըստ ՀՀ նախագահի Մամլոյ գրասենեակից «ՆՈՅԵԱՆ ՏԱՊԱՆ»-ին տրամադրած հաղորդագրութեան, հանդիպմանը զրուցակիցները խօսել են գիտահետազօտական, տնտեսութեան մէջ նորարարական տեխնոլոգիաների ներդրման ծրագրերի, արագ եւ բարձրորակ ինտերնետային կապ ապահովելու բնագաւառում համագործակցութեան վերաբերեալ: Ս.Չուրուքը համառոտակի անդրադարձել է «ալկատել»-ի գործունէութեանը, նշել Հայաստանում որոշակի ծրագրեր սկսելու իրենց ցանկությունն ու պատրաստակամութիւնը: Կարեւորելով փոխշահավետ գործակցութիւնը, Ռ.Քոչարեանն ասել է, որ ՀՀ կառավարութիւնը տեղեկատուական տեխնոլոգիաները յայտարարել է տնտեսութեան գերակայութիւններից մէկը, եւ արդէն իսկ ոլորտում նկատելի ակտիւացում ու առաջընթաց կայ: Նա առաջիկայ տարիների համար գերնպատակ է համարել զուտ ծրագրաւորման աշխատանքից բարձր տեխնոլոգիաների արտադրութեանն անցնելը:

---