«ՀԱՅՓՈՍՏ»-Ի ԱՇԽԱՏԱՆՔԻՑ ԱԶԱՏՈՒԱԾ ԱՇԽԱՏԱԿԻՑՆԵՐԸ ԳՈՐԾԵԼ ԵՆ
ԸՆԿԵՐՈՒԹԵԱՆ ԴԷՄ,- ՅԱՅՏԱՐԱՐՈՒՄ Է ՀՈԼԱՆԴԱՑԻ ԿԱՌԱՎԱՐԻՉԸ
14-11-2007 20:00:00 | Հայաստան | Տնտեսութիւն
ԵՐԵՎԱՆ, 14 ՆՈՅԵՄԲԵՐԻ, ՆՈՅԵԱՆ ՏԱՊԱՆ: «Հայփոստ»-ի աշխատանքից
ազատուած 100 աշխատակիցները գործել են ընկերութեան դէմ: Այս մասին
նոյեմբերի 14-ի ասուլիսում յայտարարեց «Հայփոստ»-ի գլխաւոր տնօրէն
Հանս Բոոնը: Միաժամանակ նա նշեց, որ առաջիկայ 5 տարիներին նման
ազատումներ չեն լինելու, թէեւ որոշ կրճատումներ նախատեսւում են:
«Որեւէ աշխատակից փողոցում չի մնայ, մենք նրանց համար կփորձենք
աշխատանք գտնել»,- հաւաստիացրեց Հ.Բոոնը: Նա տեղեկացրեց, որ
առաջիկայում ընկերութեան աշխատակիցների հետ կկնքվեն երեք տարուայ
ժամկէտով կոլեկտիւ պայմանագրեր, իսկ երկար տարիներ աշխատած
մասնագէտների հետ` անհատական անժամկէտ պայմանագրեր:
Հ.Բոոնը հաւաստիացրեց, որ փոստային 900 բաժանմունքներից ոչ
մէկը չի փակվելու, թէեւ չնշեց, թէ դրանցից քանիսն են
համապատասխանում միջազգային չափանիշներին: Յիշեցնենք, որ
ընկերութիւնը պարտաւորուել է բոլոր փոստային բաժանմունքները
համապատասխանեցնել միջազգային չափանիշներին: Չնշուեց նաեւ, թէ
«Հայփոստ»-ի կառավարման մէկ տարում որքան ներդրումներ են կատարուել:
Հ.Բոոնը տեղեկացրեց միայն, որ ընկերութեան եկամուտները վերջին ինն
ամիսներին, նախորդ տարուայ նոյն ժամանակահատուածի համեմատ, 40%-ով
աճել են:
Հոլանդացի կառավարչի կողմից ընկերութիւնում բացայայտուած
չարաշահումների գործը, ըստ Հ.Բոոնի, հետաքննութեան փուլում է, որի
վերջնական արդիւնքները պարզ կդառնան առաջիկայ մի քանի ամիսներին:
Միաժամանակ նշուեց, որ «Հայփոստ»-ում երեք տարի տեւած միջազգային
աուդիտը չարաշահումներ չի յայտնաբերել:
Հ.Բոոնը նշեց նաեւ, որ «Հայփոստ»-ում դրամաշորթութեան
երեւույթների վերացումից յետոյ միայն կարելի է խօսել
«Հայփոստբանկ»-ի բացման մասին: