ԱՄԵՆԱՇԱՏ ՄԱՀԱՊԱՏԻԺՆԵՐԸ 2006 ԹՈՒԱԿԱՆԻՆ ԻՐԱԿԱՆԱՑՈՒԵԼ ԵՆ
ՉԻՆԱՍՏԱՆՈՒՄ, ԻՐԱՆՈՒՄ ԵՎ ՊԱԿԻՍՏԱՆՈՒՄ
29-10-2007 16:28:00 | ԱՄՆ | Միջազգային
ՆՅՈՒ ԵՈՐՔ, 29 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Չինաստանը, Իրանը եւ
Պակիստանը, ըստ ՄԱԿ-ի տուեալների, գլխաւորում են այն պետութիւնների
«սեւ» ցուցակը, որոնք միւսներից աւելի շատ մահապատիժներ են
իրականացրել 2006 թուականին:
«51 պետութիւններից, որտեղ չեն վերացրել մահապատիժը, 40-ում
իշխանութեան գլուխ են կանգնած բռնապետական, աւտորիտար
վարչակարգեր»,- ասւում է զեկոյցում, որը հոկտեմբերի 29-ին
կներկայացուի ՄԱԿ-ի կենտրոնակայանում:
Չինաստանում իրագործուել է հինգ հազարից աւելի մահապատիժ, որը
կազմում է անցած տարի աշխարհում իրականացուած բոլոր մահավճիռների
98,8%-ը: Որոշ փորձագիտական գնահատումներով, որ նույնպես ներառուած
են զեկոյցում, մահապատժի ենթարկվածների չինական ցուցակը իրականում
կարող է հասնել ութ հազար մարդու:
«Չինաստանը մահավճիռների թւով արդի պատմութեան մէջ
չգերազանցուած պետութիւն է»,- նշւում է զեկոյցում:
Իրանը իրականացուած մահապատիժների թւով զբաղեցնում է երկրորդ
տեղը. 2006 թուականին այստեղ կախաղան է բարձրացուել նուազագոյնը 215
մարդ, այդ թւում եօթ անչափահասներ, ինչը երեխաների իրաւունքների
միջազգային կոնվենցիայի խախտում է:
ՄԱԿ-ի զեկոյցի հեղինակները նշում են, որ չնայած ձեւական
առումով մահապատժի ենթարկվածները մեծամասամբ մեղադրուել են
թմրադեղերի տարածման հետ կապուած հանցագործությունների մէջ, նրանցից
շատերը պատկանել են կառավարութեան ընդդիմախոսների թուին:
Պակիստանում մահապատժի ենթարկվածների թիւը անցած տարի կազմել
է 82 մարդ: