ՀԱՅԱՍՏԱՆՈՒՄ ԳՐԵԹԷ ՄԻԱԺԱՄԱՆԱԿ ԿԱՆՑԿԱՑՈՒԵՆ ԵՐԵՔ ԹԱՏԵՐԱԿԱՆ
ՓԱՌԱՏՈՆԵՐ
17-10-2007 18:40:00 | Հայաստան | Մշակոյթ
ԵՐԵՎԱՆ, 17 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ մշակոյթի
նախարարութեան աջակցութեամբ առաջիկայում միաժամանակ կմեկնարկեն
երեք թատերական` «Նռան հատիկ» մանկապատանեական, Տիկնիկային
թատերախմբերի հանրապետական 3-րդ եւ Երիտասարդ բեմադրիչների 2-րդ
փառատոները: Ինչպէս հոկտեմբերի 17-ին ասուլիսում նշեց մշակոյթի
փոխնախարար Կարինէ Խոդիկյանը, այս երեք փառատոները լուծում են
տարբեր հիմնախնդիրներ եւ հասցէագրուած են տարբեր տարիքային խմբերին:
Արդէն 7-րդ անգամ անցկացուող եւ ժամանակի քննութիւնը բռնած
«Նռան հատիկ»-ը, ըստ փառատոնի նախագահ Յասմիկ Կարապետեանի,
նպաստում է մանուկների եւ պատանիների շրջանում թատրոնի եւ
թատերարվեստի տարածմանն ու զարգացմանը, խթանում թատերական խմբերի
ձեւաւորմանը: Հ.Կարապետեանի խօսքերով, ամէն տարի փառատօնին
մասնակցում են տարբեր թատերախմբեր` չընդգրկելով արդէն յաջողութեան
հասած խմբերին: Այս տարի փառատոնը կանցկացուի հոկտեմբերի 22-ից
նոյեմբերի 2-ը, որին կմասնակցեն 19 թատերախմբեր Հայաստանից,
Արցախից, Ջավախքից:
Հայաստանի թատերական գործիչների միութեան նախագահ Յակոբ
Ղազանչեանի խօսքերով, Երիտասարդ բեմադրիչների 2-րդ փառատոնը, որն
այս տարի կանցկացուի հոկտեմբերի 21-26-ը Գիւմրիում, նպատակ ունի
աջակցել երիտասարդ բեմադրիչներին` ընձեռելով հնարաւորութիւն
ներկայացնելու իրենց գործերը:
Հոկտեմբերի 18-ին Տաւուշի մարզի 5 քաղաքներում եւ 20
գիւղերում կսկսուի Տիկնիկային թատերախմբերի հանրապետական 3-րդ
փառատոնը, որին կմասնակցեն 20 տիկնիկային թատերախմբեր Հայաստանից,
Ջավախքից եւ ԼՂՀ-ից` ներկայացնելով 50 բեմադրութիւն: Այս
փառատոնը, ըստ կազմակերպիչների, սպասուած տոն է հեռաւոր մարզերում
ապրող երեխաների համար: