«ՌՈՅԱԼ ԱՐՄԷՆԻԱՅԻ» ԲԱԺՆԵՏԷՐԸ ՎԵՐԱԴԱՐՁԵԼ ԵՎ ԿԱԼԱՆՈՒԵԼ Է,
ԴԱՏԱՔՆՆՈՒԹԻՒՆԸ ՀԵՏԱՁԳՈՒԵՑ ՄԻՆՉԵՒ ՀՈԿՏԵՄԲԵՐԻ 15-Ը
03-10-2007 19:30:00 | Հայաստան | Հասարակութիւն
ԵՐԵՎԱՆ, 3 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: «Ռոյալ Արմէնիա»
ընկերութեան համասեփականատէր Գագիկ Յակոբեանը հոկտեմբերի 3-ին
վերադարձել է Երեւան, օդանավակայանից ոստիկանները նրան ուղեկցել են
Երեւանի Շենգաւիթ համայնքի ոստիկանութեան բաժին, նա կալանաւորուել է
եւ տեղափոխուել «Նուբարաշէն» քրէակատարողական հիմնարկ: Այդպիսով ի
կատար է ածուել Քրէական վերաքննիչ դատարանի օգոստոսի 29-ի որոշումը
նրա նկատմամբ խափանման միջոց կալանքը ընտրելու մասին: Այդ
որոշմամբ, բուժման նպատակով Իսպանիայում գտնուող Գ.Յակոբեանի
նկատմամբ հետախուզում էր յայտարարուել, իսկ նրա մասով գործը
կասեցուել էր մինչեւ նրա վերադարձը:
Ինչպէս «ՆՈՅԵԱՆ ՏԱՊԱՆ»-ի թղթակցի հետ զրոյցում յայտնեց
Գ.Յակոբեանի պաշտպան Աշոտ Սարգսեանը, հոկտեմբերի 3-ին ինքը
միջնորդութիւն է ներկայացրել Քրէական վերաքննիչ դատարան, խնդրելով
քննել Գ.Յակոբեանի խափանման միջոցը փոխելու հարցը, ինչպէս նաեւ
գործը կասեցումից հանել եւ դատաքննութիւնը վերսկսել զույգ
ամբաստանեալների մասնակցութեամբ: Յիշեցնենք, որ «Ռոյալ Արմէնիա»
ընկերութեան փոխտնօրեն Արամ Ղազարեանի մասով գործը քննվում էր
Քրէական վերաքննիչ դատարանում` մեղադրողների եւ տուժողի` «Ֆեդերալ
Ինվեստմենտ գրուպ»-ի ներկայացուցիչ Վաչէ Պետրոսեանի ներկայացուցչի
վերաքննիչ բողոքների հիման վրայ: Նրանք բողոքարկում են Երեւանի
Կենտրոն եւ Նորք-Մարաշ համայնքների առաջին ատեանի դատարանի
արդարացման դատավճիռը, պահանջելով ամբաստանեալներին յանցաւոր
ճանաչել մեղադրանքի ողջ ծաւալով` հաշիւ-ապրանքագրերը կեղծելու,
հարկերի վճարումից չարամտօրէն խուսափելու, մաքսանենգութեան,
յանցաւոր ճանապարհով ստացուած եկամուտները օրինականացնելու,
«Federal Investment Group» ընկերութեան գոյքը խաբէութեամբ
յափշտակելու մեղադրանքներում:
Ա.Ղազարեանի մասով դատական նիստը հոկտեմբերի 3-ին չկայացաւ,
դատարանի յայտարարութեամբ` մեղադրողների բացակայութեան պատճառով:
Մեղադրողները դատարան էին ներկայացել դատական նիստի ժամից 19 րոպե
ուշացումով, սակայն արդէն դատարանը նիստը յետաձգել էր
մինչեւ հոկտեմբերի 15-ը: