ԵՐԵՒԱՆԻ ԿԵՆՏՐՈՆ ՀԱՄԱՅՆՔԻ ԻՐԱՑՄԱՆ ԵՆԹԱԿԱՅ ՏԱՐԱԾՔՆԵՐԻ
ԲՆԱԿԻՉՆԵՐԸ ՊԱՀԱՆՋՈՒՄ ԵՆ ՔԱՂԱՔԱՊԵՏԻ ՀՐԱԺԱՐԱԿԱՆԸ
27-09-2007 22:20:00 | Հայաստան | Հասարակութիւն
ԵՐԵՎԱՆ, 27 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Իրենց զբաղեցրած
բնակելի տարածքների սեփականաշնորհման գործընթացը ձգձգելու
կապակցութեամբ սեպտեմբերի 27-ին ՀՀ կառավարութեան շէնքի մօտ բողոքի
ցոյց էին կազմակերպել Երեւանի Եզնիկ Կողբացի փողոցի եւ Դալմայի
այգիների բնակիչները: Նրանք պահանջում են վերականգնել իրենց
ոտնահարուած իրաւունքները եւ ճանաչել իրենց կողմից օգտագործվող
հողամասերի եւ բնակարանների նկատմամբ սեփականութեան իրաւունքը:
Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց «Սեփական իրաւունքի
պաշտպանութիւն» հասարակական կազմակերպութեան նախագահ Վաչագան
Յակոբեանը, ՀՀ վարչապետ Սերժ Սարգսեանը, ապրիլի 13-ին ընդունելով
ցուցարարներին, խոստացել էր խորհրդարանական ընտրութիւններից
անմիջապէս յետոյ լուծել այդ խնդիրը: Թէեւ վարչապետն այդ
տարածքներում անշարժ գոյքի սեփականաշնորհման գործընթացն
արագացնելու յանձնարարութիւն էր տուել քաղաքապետ Երուանդ
Զախարյանին, սակայն, ըստ Վ.Յակոբեանի, մինչ օրս այդ յանձնարարականը
չի կատարուել:
Վ.Յակոբեանի խօսքերով, կառավարութեան մի շարք որոշումների
հիման վրայ, որոնք յետագայում ճանաչուեցին հակասահմանադրական,
Երեւանի քաղաքապետարանը, օգտագործելով ուժային կառոյցների,
վարչական եւ դատական համակարգերի լծակները, իրականացրել եւ այժմ էլ
շարունակում է իրականացնել ՀՀ քաղաքացիների զանգվածային տեղահանում
իրենց պատկանող բնակարաններից:
«Մենք պահանջում ենք քաղաքապետի հրաժարականը. նա պէտք է
պատասխանատւութեան ենթարկուի «պետական կարիքների» անուան տակ
տարածքները գործարարներին վաճառելու համար»,- յայտարարեց
Վ.Յակոբեանը:
«Պետական կարիքների զոհեր» ՀԿ-ի նախագահ Սեդրակ Բաղդասարեանը
նշեց, որ վարչապետի կողմից դրական պատասխան չստանալու դէպքում
բնակիչները մտադիր են բաց նամակով դիմել հանրապետութեան նախագահին,
ինչպէս նաեւ միջազգային մի շարք կառոյցների, այդ թւում` Եւրոպական
դատարան: