ՓԱՐԻԶ, 24 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեպտեմբերի 22-ին 84 տարեկան հասակում մահացել է ֆրանսիացի դերասան, աշխարհահռչակ մնջախաղաց Մարսել Մարսոն: Այս մասին սեպտեմբերի 23-ին հաղորդել են դերասանի հարազատները: Մարսել Մարսոն ծնուել է 1923թ. մարտի 22-ին Ստրասբուրգում: 2-րդ աշխարհամարտի տարիներին մասնակցել է Հակաֆաշիստական դիմադրութիւն շարժմանը: Եղել է Ֆրանսիայի գեղեցիկ արուեստների ակադեմիայի անդամ: Արժանացել է Պատւոյ լեգիոնի շքանշանի: 1947թ. Մարսել Մարսոն ստեղծում է Բիպի` թունդ սպիտակեցրած դէմքով, զոլավոր շապիկով եւ ճմռթված գլանագլխարկով ծաղրածուի կերպարը, իսկ 1949թ.` իր թատրոնը, որն այն ժամանակ մնջախաղի միակ թատրոնն էր աշխարհում: 1978թ. Փարիզում հիմնել է Մնջախաղի միջազգային դպրոց: «Ես վստահ եմ` կարելի է երիտասարդ լինել ու ծերունու սիրտ ունենալ: Եվ ընդհակառակը` տարեց մարդու սրտի տակ կարող է լիովին ջահել սիրտ տրոփել: Կեանքը հիասքանչ է, եթէ նոյնիսկ ծանր է»,- ասում էր Մարսել Մարսոն: Մարսել Մարսոյի հուղարկավորությունը տեղի կունենայ Պեր Լաշեզ գերեզմանատանը:

---