ՖՐԱՆՍԻԱՆ ՊԷՏՔ Է ՊԱՏՐԱՍՏՈՒԻ ԻՐԱՆԻ ՀԵՏ ՊԱՏԵՐԱԶՄԻ,- ՅԱՅՏԱՐԱՐՈՒՄ
Է ՖՐԱՆՍԻԱՅԻ ԱԳՆ ՂԵԿԱՎԱՐ ԲԵՌՆԱՐ ՔՈՒՇՆԵՐԸ
17-09-2007 14:26:00 | | Միջազգային
ՓԱՐԻԶ, 17 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Ֆրանսիան պէտք է
պատրաստուի Իրանի հետ պատերազմի: Այս մասին հեռուստահարցազրույցի
ժամանակ յայտարարել է Ֆրանսիայի արտգործնախարար Բեռնար Քուշները:
Ըստ նրա, իրանական ատոմային ճգնաժամը ամենալուրջ խնդիրներից
մէկն է աշխարհում, եւ համաշխարհային հանրութիւնը չպէտք է թոյլ
տայ, որպէսզի Թեհրանի ձեռքը ատոմային ռումբ ընկնի: Քուշները ընդգծել
է, որ առաջին հերթին անհրաժեշտ է օետագործել դիւանագիտական բոլոր
հնարաւոր միջոցները, առաւելագոյն ճնշում գործադրել Իրանի վրայ,
սահմանել տնտեսական լուրջ պատժամիջոցներ, բայց այնպէս, որպէսզի
դրանք վերաբերեն կառավարող վերնախավին եւ գործարարներին, այլ ոչ թէ
հասարակ իրանցիներին: ԱԳՆ ղեկավարը նշել է, որ ֆրանսիական որոշ
ընկերութիւնների արդէն խորհուրդ է տրուել պայմանագրեր չկնքել
իրանական ֆիրմաների հետ:
«Մենք խնդրել ենք որոշակի թւով ընկերութիւնների չմասնակցել
իրանական յայտամրցոյթներին: Դա ազդանշան է, որ մեր
մտադրութիւնները շատ լուրջ են»,- նշել է Ֆրանսիայի արտաքին
գերատեսչութեան ղեկավարը:
Ինչպէս նշում են Ֆրանսիայի ԱԳՆ ներկայացուցիչները, իրանեան
հարցը առանցքային թեմաներից է լինելու Ռուսաստանում Բեռնար
Քուշների այցի ժամանակ, որը սկսւում է սեպտեմբերի 17-ին:
Մասնաւորապէս, նրանց կարծիքով, իր ռուս գործընկեր Սերգեյ Լաւրովի
հետ Քուշների հանդիպմանը կշոշափվի ՄԱԿ-ի կողմից Իրանի վերաբերեալ
նոր բանաձեւի ընդունման հարցը: