ԵՐԵՎԱՆ, 12 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեպտեմբերի 12-ին
Հայաստանի եւ Ռուսաստանի գրողների միութիւնների միջեւ ստորագրուեց
բարեկամութեան, համագործակցութեան եւ փոխօգնության գործող
պայմանագիրն ամրապնդող փաստաթուղթ: Այս արարողութեամբ պաշտօնապէս
բացուեցին «Ռուսական խօսքի օրերը» Հայաստանում:
ՀԳՄ նախագահ Լեւոն Անանեանը նշեց, որ, պայմանագիրը գործում է
շուրջ 10 տարի, եւ այդ տարիների ընթացքում բաւականին մեծ աշխատանք
է տարուել, մասնաւորապէս, ռուսական եւ հայկական բազմաժանր
ստեղծագործությունները թարգմանելու ուղղութեամբ:
«Բարեկամութեան եւ համագործակցութեան ռուսական ընկերութիւնն
ամէն կերպ նպաստում է երկու երկրների միջեւ գրական, տեղեկատուական
փոխանակումների վերականգնմանը: Այդ նպատակով այստեղ ենք բերել մի
շարք գրքեր, որոնք կապացուցեն, որ մեր երկրներում գրականութիւնը
եւ պոեզիան ապագայ ունեն: Գրականութեան միջոցով է, որ յատկապէս սերտ
կապեր պիտի ունենանք միմեանց հետ»,- ընդգծեց ռուսական
պատուիրակութեան ղեկավար, Հայաստանի հետ բարեկամութեան եւ
համագործակցութեան ռուսական ընկերութեան նախագահ Վիկտոր
Կրիվոպուսկովը:
ՌԴ գրողների միութեան քարտուղար Նիկոլայ Պերեյասլովն ասաց, որ
հայ եւ ռուս գրողների հանդիպումները թէեւ յաճախ չեն լինում, սակայն
սովորաբար արգասաբեր են: Նրա խօսքով, ռուս եւ հայ ժողովուրդների
միջեւ գրական շփումները հնարաւոր են դառնում անկեղծ ու փոխշահավետ
համագործակցութեան շնորհիւ:
Մինչեւ սեպտեմբերի 17-ը կանցկացուեն բազմաբնոյթ մշակոյթային
միջոցառումներ` նուիրուած ռուսաց լեզուին, Հայաստանի եւ Ռուսաստանի
միջեւ գրական, տեղեկատուական կապերի ամրապնդմանը: «Ռուսական խօսքի
օրերը» կազմակերպել է Հայաստանի հետ բարեկամութեան եւ
համագործակցութեան ռուսաստանեան ընկերութիւնը: