ՀՈԼԱՆԴԻԱՅՈՒՄ ԹՈՒՐՔ ԽՈՐՀՐԴԱՐԱՆԱԿԱՆԻ ԿՈՒՍԱԿԻՑՆԵՐԸ ՊԱՀԱՆՋՈՒՄ
ԵՆ ՆՐԱ ՀՐԱԺԱՐԱԿԱՆԸ
13-08-2007 18:28:00 | | Միջազգային
ԱՄՍՏԵՐԴԱՄ, 13 ՕԳՈՍՏՈՍԻ, ՆՈՅԵԱՆ ՏԱՊԱՆ: Հոլանդիայում
ազգութեամբ թուրք սենատոր Դյուզգյուն Յըլդըրըմի կուսակիցները
պահանջում են վերջինիս հրաժարականը: Այս մասին հաղորդում է
թուրքական մամուլը:
Հոլանդիայի նահանգային խորհրդարանների անդամների
ընտրութիւններում Դյուզգյուն Յըլդըրըմը Սոցիալիստական
կուսակցութեան ցուցակով ընտրուել է որպէս սենատոր: Սակայն
կուսակցութեան գլխաւոր քարտուղար Հանս վան Հեյնինգենը նամակ է յղել
ազգութեամբ թուրք սենատորին եւ պահանջել մինչեւ օգոստոսի 24-ը վայր
դնել իր մանդատը:
Հոլանդիայում Սենատի անդամները ընտրվում են նահանգային
խորհրդարանների անդամների կողմից: Մայիսի 29-ին կայացած
ընտրութիւններին Դյուզգյուն Յըլդըրըմը մասնակցել է Սոցիալիստական
կուսակցութեան կազմում, որի ցուցակում զբաղեցրել է 18-րդ
հորիզոնականը: Սակայն քուէարկութեան ընթացքում ձայների
մեծամասնութեամբ Յըլդըրըմը, զբաղեցնելով ցուցակում 12-րդ
հորիզոնակը, ընտրուել էր Սենատի անդամ:
Սոցիալիստական կուսակցութիւնն իր պահանջը հիմնաւորում է
նրանով, որ «կուսակցութեան ցուցակը փոփոխման ենթակայ չէ», իսկ
Յըլդըրըմը ընտրուել է 12-րդ թեկնածուի փոխարէն: Կուսակցութիւնը
պահանջում է, որ վերջինս իր տեղը զիջի ցուցակով իրենից առաջ
գրանցուած թեկնածուներից մէկին:
Ազգութեամբ թուրք սենատորը թուրքական
հեռուստաընկերություններից մէկին տուած հարցազրոյցի ժամանակ նշել
է, թէ «Սոցիալիստական կուսակցութեան որոշումը ժողովրդավարական չէ».
«Իմ հրաժարականի հետ կապուած պահանջը կարող է բխել այն բանից, որ ես
ծագումով թուրք եմ: Սակայն չեմ պատրաստւում զիջել իմ դիրքերը եւ
շարունակելու եմ պայքարել»,- յայտարարել է Դյուզգյուն Յըլդըրըմը: