ՀԱՅԱՍՏԱՆԻ ՊԵՏԲՈՒՀԵՐՈՒՄ ՍՈՎՈՐԵԼՈՒ ՀԱՄԱՐ ՄԻՆՉ ՕՐՍ ՅԱՅՏ ԵՆ
ՆԵՐԿԱՅԱՑՐԵԼ 233 ՍՓԻՒՌՔԱՀԱՅ ԴԻՄՈՐԴՆԵՐ
10-08-2007 15:30:00 | Հայաստան | Հասարակութիւն
ԵՐԵՎԱՆ, 10 ՕԳՈՍՏՈՍԻ, ՆՈՅԵԱՆ ՏԱՊԱՆ: Հայաստանի պետական
բուհերում սովորելու համար օգոստոսի 10-ի դրութեամբ յայտ են
ներկայացրել 233 սփիւռքահայ դիմորդներ. հիմնականում` Վրաստանից,
Ռուսաստանից, ինչպէս նաեւ ԱՄՆ-ից, Իրանից, Բելառուսից, Թուրքիայից,
Լիբանանից: Այս մասին «ՆՈՅԵԱՆ ՏԱՊԱՆ»-ի թղթակցին յայտնեց ՀՀ
Կրթութեան եւ գիտութեան նախարարութեան Միջազգային
համագործակցութեան եւ Սփիւռքի վարչութեան Սփիւռքի հետ կապերի
բաժնի առաջատար մասնագէտ Ամալյա Քոչարեանը:
Նա նշեց, որ սփիւռքահայ դիմորդների համար ՀՀ կառավարութեան
որոշմամբ այս տարի յատկացուել է անվճար ուսուցման 70 տեղ: Այդ
տեղերը կյատկացուեն հայագիտական մասնագիտութիւններ ունեցող եւ
արուեստի բուհերին. հիմնականում Երեւանի Խ.Աբովեանի անուան
Մանկավարժական համալսարանին, ԵՊՀ-ին, Երեւանի գեղարուեստի պետական
ակադեմիային, Կոմիտասի անուան կոնսերուատորիային, Երեւանի թատրոնի եւ
կինոյի ինստիտուտին:
Ա.Քոչարեանը յայտնեց նաեւ, որ սփիւռքահայ դիմորդների յայտերը
կընդունուեն մինչեւ օգոստոսի 20-ը, իսկ ընդունելութեան
քննությունները կանցկացուեն օգոստոսի վերջերին: Ըստ նրա, այն
դիմորդները, ովքեր չեն յաղթահարի նախատեսուած «դրական շեմը», կարող
են սովորել տուեալ բուհի նախապատրաստական բաժնում: