ՊԱԿԻՍՏԱՆՈՒՄ ՀՆԱՐԱՒՈՐ Է` ՀԱՅՏԱՐԱՐՎԻ ԱՐՏԱԿԱՐԳ ԴՐՈՒԹԻՒՆ
09-08-2007 17:20:00 | | Միջազգային
ԻՍԼԱՄԱԲԱԴ, 9 ՕԳՈՍՏՈՍԻ, ՆՈՅԵԱՆ ՏԱՊԱՆ: Պակիստանի
կառավարութիւնը քննարկում է երկրում արտակարգ դրութիւն մտցնելու
հարցը, որի մասին որոշումը կկայացուի մօտակայ ժամերի ընթացքում: Այս
մասին հաղորդում է «BBC»-ն:
Երկրում ստեղծուած պայթիւնավտանգ իրավիճակի պատճառներից մէկը
Աֆղանստանի սահմանին «Ալ Ղաիդա»-ի գրոհայինների հետ բախումներն են:
Վերջին օրերի ընթացքում զոհուել է 12 եւ վիրաւորուել 10 գրոհային:
Ըստ պաշտօնական տուեալների, պակիստանցի զինծառայողների կողմից զոհեր
չեն գրանցուել:
Նշւում է, որ Իսլամաբադի համար սպառնալիք է հանդիսանում նաեւ
ԱՄՆ-ի` ստեղծուած իրավիճակին հնարաւոր միջամտութիւնը: Ամերիկեան
քաղաքական գործիչները բազմիցս յայտարարել են Պակիստանում ինչպէս
«Ալ Ղաիդա»-ի, այնպէս էլ թալիբների դիրքերին հարուած հասցնելու
մասին:
Նշւում է նաեւ, որ Պակիստանի նախագահ Փերվեզ Մուշարաֆը վերջին
րոպեին հրաժարուել է մեկնել Քաբուլ, որտեղ օգոստոսի 9-ին մեկնարկում
է պակիստանա-աֆղանական աւագանու ժողովը, որի ընթացքում քննարկվելու
է ահաբեկչութեան թեման:
Պակիստանի ներքաղաքական իրավիճակը սրուել էր այն բանից յետոյ,
երբ Իսլամաբադում կառավարական զորքերը գրոհով վերցրել էին Կարմիր
մզկիթը:
Յիշեցնենք, որ Կարմիր մզկիթը Պակիստանի ոստիկանութեան եւ
զօրքերի կողմից յուլիսի 3-ին շրջափակվել էր իսլամիստ ուսանողների
եւ ներքին զօրքերի ստորաբաժանման միջեւ տեղի ունեցած բախումից
յետոյ, ինչի հետեւանքով զոհուել էր 12 եւ վիրաւորուել մօտ 150 մարդ:
Յուլիսի 11-ին Պակիստանի կառավարական զորքերը գրոհայիններից
ամբողջութեամբ ազատագրել էին մզկիթը: Գրոհի ժամանակ մեծ կորուստներ
էր գրանցուել ինչպէս իսլամիստ գրոհայինների, այնպէս էլ
զինվորականների կողմից: Սպանուել էր նաեւ իսլամիստների առաջնորդ
Աբդուլ Ռաշիդ Գազին: