ՆԱՏՕ-Ն ՊԷՏՔ Է ՊԱՏՐԱՍՏ ԼԻՆԻ ՌՈՒՍԱՍՏԱՆԻՆ ՀԱԿԱՀԱՐՈՒԱԾ
ՀԱՍՑՆԵԼՈՒ,- ՅԱՅՏԱՐԱՐՈՒՄ Է ԱՄԵՐԻԿԱՑԻ ԶԻՆՈՒՈՐԱԿԱՆ ԳՈՐԾԻՉԸ
01-08-2007 13:52:00 | ԱՄՆ | Միջազգային
ՎԱՇԻՆԳՏՈՆ, 1 ՕԳՈՍՏՈՍԻ, ՆՈՅԵԱՆ ՏԱՊԱՆ: ԱՄՆ-ի զինուած ուժերի
ռազմավարական հրամանատարութեան հրամանատար գեներալ Ջեյմս Կարտրայթը
յայտարարել է, թէ ՆԱՏՕ-ն ԱՄՆ-ի հետ համագործակցութեամբ պէտք է
պատրաստ լինի «Ռուսաստանի վարքագծին հակահարուած հասցնելու»:
«Երկարաժամկէտ խնդիրն է օգնութիւն ցուցաբերել դաշնակիցներին
Ռուսաստանի Դաշնութեան առնչութեամբ մտահոգութիւնները յաղթահարելու
համար, ինչպէս նաեւ յիշեցնել հարկ եղած դէպքում ռուսաստանեան
վարքագծին համատեղ հակահարուած տալու կարեւորութեան մասին»,- նշւում
է ԱՄՆ-ի Սենատում Կարտրայթի նոր պաշտօնում նշանակուելու հետ կապուած
վերջինիս զեկոյցում: Նշենք, որ նախագահ Ջորջ Բուշը ԱՄՆ-ի զինուած
ուժերի շտաբների ղեկավարների միացեալ կոմիտէի ղեկավարի տեղակալի
պաշտօնում առաջադրել է Ջեյմս Կարտրայթի թեկնածութիւնը:
Ամերիկացի գեներալը երկարաժամկէտ խնդիրների շարքն է դասել
նաեւ «Ռուսաստանում ՆԱՏՕ-ի վերաբերեալ հասարակական կարծիքի վրայ
դրական ազդեցութեան, ինչպէս նաեւ ժողովրդավարական եւ պաշտպանական
բարեփոխումների առաջընթացի ապահովումը». «Պէտք է բարելաւուի
Ռուսաստանի եւ ՆԱՏՕ-ի ռազմա-քաղաքական փոխգործակցությունը ինչպէս
Եվրոպայում, այնպէս էլ գլոբալ մասշտաբներով, ներառեալ
հակահրթիռային պաշտպանութեան ոլորտում»,- նշուած է գեներալ
Կարտրայթի զեկոյցում: